九、城隧巴拓新線 新界過海更便捷

2021年4月26號，九巴同城巴分別開辦新嘅新界去港島隧道巴士路線。

其中九巴有獨營、白石角←→灣仔（會展）嘅900號路線，逢星期一至五分別喺上、下午繁忙時間各提供去程、回程服務。頭班車會喺0700時由白石角開出，首航前已經有一班巴士迷喺白角石總站守候。

由白石角開出後，巴士會途經香港科學園、源禾路一帶，然後行經青沙公路、西區海底隧道前往港島，再經停上環、中環、金鐘、灣仔。

九巴900號路線首航班次喺大約0753時到達灣仔（會展），巴士車長喺到達總站後仲一度撳出「白石角」方向牌畀大家拍攝。

另一方面，城巴有獨營、落馬洲（新田）←→西灣河嘅976號路線，逢星期一至五分別喺上、下午繁忙時間各提供去程、回程服務。

由落馬洲（新田）開出後，巴士會途經壆圍、逢吉鄉、沙埔村（峻巒）、高埔村一帶，然後行經三號幹線、中環及灣仔繞道前往港島，再經停北角、鰂魚涌、太古、西灣河，回程另加停中環

頭班車會喺0700時由落馬洲（新田）開出，首航前有簡單啟航儀式。

不過有少許花絮：有車長表示，雖然儀式用嘅「燒豬」只係蛋糕，不過喺頸位「橫斬」咁「切燒豬」好似唔啱傳統喎！（編按：是旦啦！）