【香港電車】姜濤4月底生日 支持者整電車廣告祝賀

年輕演藝人姜濤近來喺香港備受年輕觀眾歡迎，縱使「大台」惡搞佢仍然從容面對，甚至主動為支持者嘅失禮表現公開致歉，著實令人覺得「抵佢『紅』得起」。

早前，有藥廠嘅香港代理喺宣傳預防HPV病毒疫苗，就以姜濤做「暖男」代表，相關廣告覆蓋巴士站以及電車車身等。

2021年4月30號將會係姜濤22歲生日，佢嘅一班支持者不惜工本咁搵咗香港電車公司，利用電車公司嘅廣告位祝姜濤「生日快樂」…其中搶先「出閘」嘅係53E百德新街東行電車站。

至於嚟到2021年4月23號，披上姜濤生日快樂全車身廣告嘅 #5 電車，0833時「首航」駛出屈地街電車廠，開去銅鑼灣。

#5 電車喺大約1句鐘後到達銅鑼灣，據悉會先行「3轉」銅鑼灣←→跑馬地路線，以便一眾支持者可以一次過影晒電車同電車站合照。

有一段小插曲：由於早前擔心沿途會有姜濤支持者「末路狂奔」咁追「頭班車」，電車公司向警方報備，警方亦一度派交通警車沿途視察…