近年香港坊間一直吹起「懷舊」風潮，舉凡有啲「似似地」屬於「老香港」嘅嘢，往往都令香港人一窩蜂咁分享「自身經歷」：
「嘩！呢個咪就係____！」
『我以前都係咁咁咁㗎！』
但又有幾多人知道，自己係好容易被「自身經歷」誤導，因為「條件反射」而錯誤咁聯繫唔同嘅事物？例如：
- 學校一定有鬼故
- 紅色巴士一定係九巴
- 半艙式雙層巴士一定係「長牛」
- 無冷氣嘅巴士一定叫「熱狗」
是咁的，2021年3月8號朝早，判官無啦啦講起，喺網絡社交媒體某個討論「舊香港」嘅群組，有人貼出1張照片，問其他人「有人知渡輪上點解有呢舊嘢嗎？」
本身貼相提問嗰位仁兄係合理嘅。不過，當照片中見到有1個啡色櫃、1張摺枱之類…然後，香港啲網民就一窩蜂咁答：
咦？大家認真㗎？
大家睇清楚嗰架係咩渡輪未㗎？
近年天星小輪銳意開拓「海上遊」，發展出2條觀光航線，並主力用以下渡輪負責：
- 天星維港遊：「輝星」號
- 天星海港遊：「世星」號
群組嗰張相入面嘅渡輪其實係天星小輪旗下「午星」號，平時會負責一般港內線渡輪服務，當觀光航線原有渡輪需要「上排」，就要去「頂更」，所以渡輪上需要有相應設備。
重點係：
天星小輪一向無賣餐蛋麵㗎！
（天星小輪廣播有叫乘客唔好飲食）
即係咁講，話晒香港天星小輪早已經聞名全球，國家地理旅遊雜誌列佢做「人生50個必到景點」之一、美國旅遊作家協會亦評選佢做「全球十大最精彩渡輪遊」之首――唔好香港人自己反而「一嚿雲」先至得㗎！
1 Trackback / Pingback