2016年成立嘅彼樂部創作有限公司，一直以「KONSEPT」為商標，推出一系列仿真遙控車玩具。2019年12月佢哋推出咗一款以公共交通工具做藍本嘅仿真遙控車玩具：智能遙控積木電車 KB120。
時間嚟到2021年2月，「KONSEPT」旗下再推出咗一款以公共交通工具做藍本嘅仿真遙控車玩具，呢次嘅款式係得到九巴官方授權嘅富豪B8L，分別係九巴塗裝 K800（仿照V6B75，WF4582）以及龍運塗裝 K801（真車未出牌，所以車牌係LWB）。
雖然好多人會以為佢哋只係「玩具」，但彼樂部仍然重視要仿照原車設計，附帶「玻璃梯」，外型比坊間唔少其他牌子更加像真，尺寸大約係28 x 6 x 10.5（L x W x H，厘米）。
車頭同車尾都裝埋LED，頭／尾燈可以著，而且車頭仲有LED顯示屏做「電牌」，九巴版會出98號路線，龍運會出E34A號路線。
至於講返遙控車嘅技術參數，車前倒後轉左右就一定有，遙控器使用2.4Ghz 頻率，有效範圍大約25米，仲可以支援多架遙控車一齊玩唔受干擾。
電池呢~遙控器用2粒AAA電芯，巴士自己就內置咗充電池，可以經USB充電，大約45~60分鐘充滿，續航時間大約40~45分鐘。
呢2款遙控巴士可以經彼樂部網站預訂，預購價港幣399蚊，而3月15號前上九巴網站或者去美孚曼坊搵九巴買就有早鳥優惠價港幣379蚊，員工就係港幣339蚊，預計2021年4月中可以出貨，有興趣「劈車」嘅朋友仔留意吓喇！
2 Trackbacks / Pingbacks