三菱 ROSA 真係好差??

「香港第二代」的BE4系，本可以係威係勢

1988年，港府宣佈放寬小巴座位上限，由14加到16，三菱代理乘勢引入「第二代」BE4 系。

外型夠晒嶄新奪目，仲要推出總長 7m 20座位規格，「食埋」旅遊巴士市場。只不過初期輸入的規格，採用嘅引擎型號仍舊係BH214嘅 4D31，但調校馬力由100ps 夾硬谷上 130ps，以因應車重增加及加大冷氣系統功率，但都係唔掂然後好快換上「又大食又無力」仲要好易「水滾茶靚」嘅 4D33。及後响1992年實施EURO 1 排放管制，換上有 Turbo 嘅 4D34 引擎，而豐田 Coaster 剛推出新款的 BB42 所採用的仍然係「NA偈」嘅 14B。在所謂傳統智慧「多個香爐多隻鬼」── 多個 Turbo 多樣嘢壞 + 無Turbo 咪又係咁行……

似乎話三菱 Rosa 係垃圾，不過是因為業界嘅「保守」甚至係「食古不化」嘅思維喎。但當然，點都會有代理同車廠嘅因素，日後另文詳談。

BE6系敵不過「非洲式用車」

至於嚟到今代嘅 BE6 系，乘住日本廠方同時推出「超長陣」7.7m 規格，進一步攻佔旅遊巴市場，另外因應有小巴業界以 Euro 3 柴油 Rosa 對「石油氣小巴政策」作出反擊行動，

理論上該可以「收復失地」，只不過又再一次「將貨就價」，唔係話差，而係唔太適合香港嘅路面同車輛使用習慣，衍生出更多嘅維修保養問題，就開始出現「沒落」跡象。

及後為順帶改善問題而轉用「四碟迫力」規格，奈何業界「非洲式用車」陋習未改，制動系統容易「積死」，加上「車用石油氣價錢平」嘅局面成勢，縱使代理正式引入獨立懸掛規格、「復古」前碟後鼓制動的 BE649，但還是未能扭轉「豐田天下無敵」之局。

再甚至是 2007年實施 Euro 4 排放管制，日本三菱廠方改配連好多老師傅一打開引擎蓋都粗口橫飛嘅 4M50引擎 (如下圖)，三菱 Rosa 嘅「勢」可以話一去不返了。