【本台獨家】平治低地台小巴終於去驗車

【巴士台獨家報導】 因可能唔係豐田導致運抵香港逾18個月都仲未完成驗車出牌嘅平治 Sprinter 516CDi EVM 低地台小巴，今日終於出咗去九龍灣驗車中心進行 Type Approval 驗車，即係話如無意外就好快可以正式投入服務。

大家通常會見到嘅「傾側測試」(Tilt-test) 只係 Type Approval 驗車其中一個程序有，當中仲有好多程序，例如量度架車嘅長闊高、磅重 (淨重及滿載總重)、測試制動效能…… 等等。

講返大家熟悉嘅「挑嗲匙」，响中午後進行，過程順利，當然完成傾側 35° 挑戰。

至於幾時可以「出街行」?? 據有份引入呢部車嘅 阿Lim 所講，仲有一啲「濕碎嘢」要處理，包括一啲文件…… TD 又想拖?? 阿Lim 話今次嘅驗車「加料」一切都係合理情況下出現嘅，絕非有心刁難嗰隻。

希望餘下嘅驗車及出牌流程都能順利完成，讓市民有機會體驗一吓規格上「真‧低地台小巴」。