【美國巴士】車長擔憂染肺炎 罷工致服務停頓

新型冠狀病毒（武漢肺炎）肆虐全球，乘搭公共交通工具被認為係其中一種容易令病毒傳播嘅活動，致使有啲地區嘅政府直接頒令居民唔好出街。

美國密芝根州已經有50個確診個案，而因為當地衛生部門欠缺測試劑，令到大批疑似個案未能確認排除。

其中喺底特律市，當地運輸部門旗下嘅巴士車長指出，當局未能清潔好佢哋所揸嘅巴士，加上政府頒令市內非必要業務商戶停業令佢哋難以洗手。

佢哋認為呢啲情況未能保障佢哋遠離染病風險，所以大批巴士車長喺當地時間2020年3月17號朝早無返去報到，市政府喺朝早7點公佈巴士出車率唔夠1成，到8點幾甚至要完全停駛。

底特律雖然係「汽車之城」，但其實有1/3嘅居民戶係無車階級，今次巴士停駛令佢哋返工、買生活必須品等都大受影響。當地另一個公共巴士服務營辦方隨即提出畀乘客免費搭巴士，不過要求乘客由後門上落巴士，同巴士車長保持距離。