【臺灣巴士】確診患者搭6次 巴士車長要留家

臺灣中央流行疫情指揮中心喺2020年2月27號公佈，當地新型冠狀病毒（武漢肺炎）確診「第32案例」（外籍看護）喺2月16～24日期間嘅活動史、接觸者，經臺灣衛生單位、警政單位密切調查後發現，佢曾經喺上述期間多次乘搭巴士、捷運等大眾交通運輸，而且有多處公共場所活動史，難以追查所有接觸者，因此決定公佈相關路線。

由於其中包括6次乘搭三重客運「藍38」號路線巴士；三重客運表示，已經安排當時當值嘅6名巴士車長喺2月27號收工後，以有薪假方式居家自我健康管理14日。

三重汽車客運股份有限公司總經理李建文回覆臺灣中央社記者查詢時表示，為咗令乘客同公眾安心，公司會依臺北中央流行疫情指揮中心規定，相關人員自主健康管理14日。

李建文講明旗下巴士每日都有消毒，6名巴士車長當時都有戴上口罩，但仍然叮囑6人收工後就居家自我健康管理，亦督促佢哋居家期間唔可以外出。

李建文表示，2月26號接獲通報後，立即再次全面消毒樹林站所有車輛同場地，樹林站目前職員健康狀況都正常，每日都有量度體溫、健康監測。