【澳門巴士】無戴口罩 禁上巴士

澳門交通事務局喺2020年2月3號朝早發出公告，指因應「新型冠狀病毒」（武漢肺炎）疫情持續發展，為保障巴士車長同乘客嘅健康同埋生命安全，由即日中午12點開始，澳門境內所有乘搭巴士嘅乘客必須佩戴口罩先至可以上巴士，未能遵從嘅乘客，巴士車長有權拒絕乘客使用巴士服務。

澳門交通事務局呼籲乘客留意有關安排，同時乘搭其他交通工具亦應該主動佩戴口罩同埋注意個人衛生；局方會持續留意最新情況，並要求各公共交通同埋相關管理公司繼續加強車廂、車站嘅清潔、消毒，留意車長、員工嘅身體情況，共同做好防疫工作。

當澳門又得一分之際，香港政府繼續一貫internet explorer風格，對香港市民防疫訴求充耳不聞，而各間巴士公司仍然堅持「驚犯法」就唔肯加強對乘客作防疫管理…唔通諗住「乘客咁好彩染病又咁好彩死埋就反而唔使驚被人告」？

【特別通告】根據特區政府規定：為防範新型冠狀病毒，由今日（2月3日)中午12時起，乘搭巴士之乘客必須佩戴口罩方可上車，否則車長有權拒絕乘客使用巴士服務，敬請合作！

Posted by 澳門公共汽車股份有限公司 on Sunday, February 2, 2020