烏蛟騰增專營巴 假日唔只得小巴

經過多方爭取經年，相關工務改動已經由2019年12月展開，並且喺2020年2月完成，運輸署2020年2月17號正式致函大埔區議會，確認九巴營運嘅275R號新界旅遊路線會由2020年2月23號開始，總站正式由新娘潭路公廁側（EB0895號燈柱對面）改到去烏蛟騰路盡頭嘅烏蛟騰村停車場，並且會喺入烏蛟騰方向喺烏蛟騰路加設「祠心路」站。

值得留意嘅係，雖然九巴275R號路線同新界專線小巴20R號路線同樣係去「烏蛟騰」，但每日對開12班嘅新界專線小巴20R號路線係仍然用祠心路盡頭嘅小巴總站。

至於有意見認為應該研究再進一步安排專營巴士駛入鹿頸，受制於路面，短期都係無乜可能。