今年萬聖節對英格蘭倫敦東南部奥平頓嘅一啲居民嚟講，可能要一段日子先至可以淡忘――當地時間2019年10月31號晚嘅一宗嚴重車禍，涉及兩架單層巴士同另一架房車，造成一人當場死亡。
根據第一時間喺事發現場影到嘅相片同影片，可以見到牽涉入今次車禍嘅3架車損毀非常嚴重，大量碎片散落現場一地，嗰2架巴士喺相撞後更各自剷上兩邊行人路。
倫敦消防隊向記者表示，佢哋喺萬聖節夜晚2212時經當地緊急報案熱線控制中心得知現場發生車禍，並且立即調派多架消防車連同60名消防員到場。
消防員到達現場之後，立即喺巴士車廂入面救出多名傷者，轉交倫敦救護服務處人員進行現場急救，但好可惜有一人當場證實死亡。
根據倫敦警察廳嘅資料，死者係駕駛其中一架涉事巴士嘅60歲巴士車長，現場有另外15名傷者， 其中3人情況嚴重，幸好其餘傷者只係輕傷；而24歲嘅房車司機現正以涉嫌「藥後駕駛」以及「危險駕駛導致他人死亡」被拘捕。
倫敦交通局巴士營運部總監接受英國廣播公司記者查詢嘅時候表示代表部門對死者致以深切嘅哀悼，並慰問佢嘅家屬，亦會向其他受影響人士提供輔導服務。佢亦承諾倫敦交通局必定會同巴士營運商Go-Ahead以及倫敦警察廳通力合作，一定要搵出今次車禍嘅原因。
該個路段喺車禍發生後被封閉幾個鐘頭，倫敦警察廳呼籲居民避免使用該個路段，期間有6條巴士路線受到影響需要改道，直至天光後當局移走3架車輛嘅殘骸。
倫敦警察廳嘅調查人員亦呼籲居民，不論係親身目擊事件，或者能夠提供手提電話、行車紀錄儀、閉路電視影片嘅話，就盡快聯絡調查人員，以協助釐清今次車禍嘅責任。
英國廣播公司記者喺事發現場訪問咗附近嘅居民，其中一名唔願意透露姓名嘅男居民表示，其中一架巴士喺車禍後撞咗入去佢哋屋企前面嘅花園。事發時佢喺屋入面嘅客廳聽到巨響，「其實聽落就唔似係撞車，總之係一啲好怪嘅聲音」、「我個仔得11歲，見到咁嘅情景佢好唔開心」；由於情景實在太令人傷感，「我哋全家都唔夠膽踏出家門」、「一諗到牽涉呢件事嘅人，內心就感到好苦惱」。
至於一名男居民就話「聽到有消防車同救護車嘅聲，一度以為係萬聖節有關嘅活動」、「但一見到現場嘅情景咁恐怖，個心感到好唔舒服」。
作為涉事巴士營運商嘅Go-Ahead喺網上表示會發起眾籌，務求協助喪生巴士車長嘅家屬。
2 Trackbacks / Pingbacks