【英國巴士】閂門夾住扯衫尾 拖行阿婆爭啲死

當地時間10月30號1036時，英格蘭倫敦波普勒區發生一宗驚險巴士意外。

倫敦警察廳當時接到報案，指喺東印度碼頭路有一架行走108號線嘅巴士撞傷一名70幾歲嘅阿婆。

警員同救護員到場，發覺事件懷疑係因為阿婆落巴士之後，巴士車長急急閂門，令巴士車門夾住阿婆衫角，巴士車長一畀油出站就令到巴士拖行住阿婆。

阿婆由救護車送到東倫敦一間醫院接受治療，幸好無生命危險，亦相信傷勢唔會影響將來活動能力。

至於涉事London Central旗下、隸屬Morden Wharf巴士廠管理嘅平治Citaro單層巴士，經警方作現場蒐證約3個鐘之後駛走，路面亦喺1330時重開。

倫敦警察廳發言人指車禍現正調查，未有人被捕。而倫敦交通局發言人則對有人受傷表示遺憾，並指Go-Ahead（London Central母公司）會全力調查事件。