行人強行跑過馬路 被撞再跌入巴士底

2021年11月8號朝早8點幾返工時間，尖沙咀彌敦道北京道交界嘅行人過路處發生1宗涉及公共巴士嘅車禍

現場消息指1名途人妄顧危險，面對彌敦道嘅車流都執意衝過馬路，結果被彌敦道南行嘅車輛撞到，再跌入途經嘅1架行緊271號路線嘅九巴12米版本E500型雙層巴士（車隊編號：ATENU1180，車輛登記：UJ5442）車底。

車禍後，現場有市民報案及協助檢查傷者。由於有人報稱被捲入巴士車底，大批消防及救護人員趕赴現場，然而事發正值繁忙時間，車禍後交通受阻，消防車一度需要逆線行車先至可以到達。

據悉被撞嘅係1名年約30幾歲嘅非華裔男子，被1架寶馬房車撞到，消防員到場時確認佢無被困，佢獲救時清醒，由救護車送去伊利沙伯醫院救治。

警方交通意外調查人員事後亦到場蒐集證據，調查意外責任，擾攘大約2句鐘到朝早10點幾先至解封現場，期間彌敦道南行交通嚴重受阻。

（相片撮自巴士車長通訊群組）