【巴壇隨手寫】屯馬線全通，61X 都「死梗」?!

港鐵屯馬線全線明天正式通車。一如過往，「拜鐵路教」信眾數目必定突發急速上升，事關「搭地下鐵路，話咁快就到」呢句廣告「士撈緊」深入民心，加上「搭巴士有排塞」嘅「信條」植入心坎，就算無運輸署嘅大力「宣教」，即係取消巴士/小巴線，好多人都必定立即或好快就會「決志」信奉「鐵路萬能之主」。

只不過，運輸署等部門又點會唔做「宣教」活動。無錯，今次宣教活動集中於沙田、馬鞍山地區進行，對於土瓜灣、宋皇臺兩座新開嘅「拜鐵路教廟」沒太多「傳福音」，唔係手下留情，而係九龍城區不單「信眾」數目已經相當龐大，「慕道」人數亦多如繁星，當「拜鐵路教廟」正式開光，佢哋好自然就會做所謂「用腳投票」入去虔誠參拜。唔信會咁發生？唔好唔記得2016年10月23日黃埔花園啲中產鹹魚大大聲講乜先得㗎 ~ 好囉，一天都光晒，唔駛再受(捷輝)嘅小巴佬嘅氣咯…..

由此可見「拜鐵路教廟」偉大到有如上帝創造天地時說「要有光，就有了光」(創1:3)，點可能唔發生吖！咪玩啦。

正所謂响九龍城區涉及嘅巴士、小巴路線必定被用作獻祭，爭在遲早嘅問題，仲使乜花咁多力氣去傳揚「敬畏鐵路萬能俠是智慧的開端」嘅聖訓呢。亦所以話小巴大王有份嘅金匙响一年零兩個月又唔知幾多日之前仆崩鼻接受「襪些啦LEE」呼召「臨時接辦」2, 2A 專線小巴，也不過是待作燔祭的羔羊。以為將原有捷輝傍晚特車「6 中港城」換個冧把26A 就如上帝制止亞伯拉罕將個仔獻祭咁喎。

依我睇，除咗2, 2A 同多到數唔晒响市區、沙田、馬鞍山嘅巴士、小巴路線之外，1986年4月隨住荃灣路通車而開辦嘅 61X 線巴士應該都會成為「祭品」。

可能你會反駁話搭港鐵由屯門到宋皇臺站車程要45分鐘，61X嘅行車時間相差唔遠……
無錯，呢個係事實，但唔好唔記得，由屯門「拜鐵路教」去宋皇臺站，以至鑽石山站係唔駛轉車
正所謂啲黃埔鹹魚由黃埔過海去中環要响油麻地站上一層都係狗衝咗去，唔駛轉車可以專心敬拜「鐵路萬能神」點可能唔衝多幾倍呀。所以話，就算宋皇臺站大堂去龍崗道、譚公道仲要行「時光隧道」，係阻唔到啲「信眾」嘅虔誠㗎。更何況去鑽石山站的話，連龍蟠街條馬路都唔L駛過……..

再仲有喎，龍翔道幾乎每日撞一單，正中「搭巴士會塞車」嘅「信條」，你話佢哋仲唔立即「決志」?!

甚至乎，我估仲有263，又或者連 40X、43X 都未必擺得耐㗎喇。
點解？
都係嗰句，搭鐵一程車搞掂
你話「唔係呀，唔搭 263 走去搭鐵，兜大圈之餘仲要响紅磡站轉車，邊有人咁蠢呀….」
你唔記得「新蒲崗去灣仔堅持搭鐵」嘅故事呀??! 我實實在在的告訴你，真人真事嚟㗎！

OK, fine，你認為香港仲有聰明人，知道搭263一定快過鐵…..
不過，唔好唔記得「捷輝」嘅死因之一，就係運輸署唔俾佢接辦/開辦可以快過港鐵嘅路線囉！