樂高砌出香港巴 屯門展出等大家

講起香港巴士模型，大家應該最先會浮出Corgi、80M、Model 1之類，加埋話用膠粒積木砌嘅話，頂多加埋小城故事…但如果話老牌「正貨」樂高都有嘅，大家可能「吓」一聲。

不過，睇埋落去先… （● v ●）

嗱，你無眼花，呢啲真係正版樂高膠粒積木砌出嚟嘅香港巴士模型，睇相都應該大約認得出公司同型號。

其實呢啲用正版樂高膠粒積木砌出嚟嘅香港巴士模型係出自香港本土、有超過20年創作經驗、獲得「樂高官方專業認證大師」銜頭嘅洪子健，而且除咗巴士，佢過往亦參考返實物，設計同埋人手砌出過唔少香港本土特色嘅公共交通工具模型。

今次呢批樂高香港巴士模型，其實係放咗喺一個仿照彩虹邨而砌出嚟嘅樂高膠粒積木模型入面，除咗有巴士，仲有小巴、的士、客貨車同私家車，一齊喺條「街」上面出現㗎！

如果大家想睇實物，可以去到屯門市廣場1樓中央廣場參觀「Legend Bricks 10週年呈獻：Bricks Adventure創意無限作品展」，展期係2020年6月3號到28號。

至於多年嚟都有人問到呢啲巴士模型有無機會「量產」，只可以講句：「樂高商標總公司無諗過囉！」否則點會輪到其他牌子「抄巧」完賣出街？