【電車】究竟幾幅插畫係為乜過唔到審批？

背景：「旺旺」被虐殺

2026年6月28號下晝，中国廣東省揭陽市揭東區新亨鎮坪埔村入面嘅1隻被村民長期投餵、性情溫馴流浪母狗「旺旺」，連同佢所生3隻只得半個月大嘅幼犬，遭遇慘絕人寰嘅虐殺。

涉案4名就讀當地小學、全部未夠14歲嘅鍾姓男童，案發時對「旺旺」以及幼犬用鐵絲勒頸拖行、用木棍反覆毆打、用腳踩、用利器戳刺等方式凌虐，隨後對已經受重傷嘅「旺旺」以及幼犬淋上易燃液體並縱火焚燒——整個過程長達近1句鐘，期間施暴者一路嬉笑一路拍攝影片並上傳到網絡群組——之後迅即喺微博、抖音以至海外網絡社交平台流傳，殘忍行為令人髮指。

她從小就是流浪狗，一直住在小小的下水道裡，其實才一歲多大，卻已經成為了媽媽。
四個未成年人來到這裡，起初先是對她毆打。
她本可以逃走，但為了保護身邊的三個孩子，她選擇留下。
她以為忍受過打罵就沒事了，沒想到這幾個人竟當著她的面，用棍子刺入她寶寶的太陽穴。
她當時很難過，沒有呲牙也沒有反抗，只是默默坐在旁邊的小洞裡。
隨後，這幾個人竟然潑上汽油，將她活活點燃。
她被燒了半小時，身上已經碳化，耳朵都燒脆了，但卻還活著。
接著，他們又用棍子將她的眼球戳了出來。
在彌留之際，她依然被他們用魚線拖拽、毆打。
她用盡最後一絲氣力，舔了舔已經離世的小狗，隨後離開了這個世界。
整個虐殺過程持續了一小時，影片中全程夾雜著這些小孩的嬉鬧聲，甚至叫囂著「這條死狗怎麼這麼耐死」。
這些惡魔甚至早有預謀，準備了水泥，打算一開始就將她與孩子們封死在下水道

（網上轉述）

揭陽當局喺2026年6月30號通報，聲稱涉案4名未成年人已經被送去專門學校接受矯治教育，家長亦被督促落實監護責任，而教育部門會加強生命教育。

中国網民反應：「投屏」譴責

母狗「旺旺」喺火中痛苦奔跑哀鳴、幼犬喺棍棒下無力掙扎——上述情景點起中国網民怒火，並且迅速延燒到香港、臺灣乃至全球各地，成為近期兩岸三地最受關注嘅「惡性社會事件」之一。時至2026年7月20號，遠至意大利嘅主流報章《La Stampa》都有報道呢宗虐殺犬隻事件。

自從事件曝光，中国網民自發發起「旺旺」「投屏運動」，透過商場、廣場大螢幕投放「旺旺」事件相關影像以及訴求，強烈譴責虐待行為、呼籲針對動物保護立法。截至2026年7月20號，「旺旺」相關運動已覆蓋晒中国全部31個省級行政區，合共記錄到241個獨立「投屏」地點——單係廣東就有11個地點。

現時喺中國進行任何「線下」未經批准嘅舉牌、抗議行動都被視為「非法」，類似嘅聲援多數係「線上」經網絡社交媒體聚集。1份由網絡社交媒體傳出、來自中国沈陽大東區網信辦嘅《網絡輿情風險提示單》顯示：

如果屬實，「旺旺」相關運動已經成為中国當局高度警惕嘅「政治事件」。

香港：參與爭取完善保護動物機制→「不如搵香港電車出個全車身廣告」

講返香港，「旺旺」事件同樣喺網絡發酵多日，唔少人對此「深惡痛絕」，香港網民亦集資喺旺角投放電子廣告牆、銅鑼灣出現手寫立牌，表達「為『旺旺』發聲」，甚至邀得國際動物福利組織介入請願，「Change.org」連署以及全球悼念活動此起彼落。

香港本地幫助流浪動物以及動物義工嘅「Suppaw – Bring Me Home寵物領養平台 (91/18322)」（以下稱「Suppaw」）就喺2026年7月14號經網絡社交媒體專頁宣傳聯署要求引入「謹慎責任」法例、期望政府能加快立法進度，為弱勢動物編織法律安全網——相關貼文附有3幅以「旺旺」生前身影作參考嘅插畫。

「Suppaw」其後喺2026年7月17號表示，唔想「旺旺」呢件事只係停留喺網絡上嘅難過、憤怒。佢哋收到建議：「不如畀『旺旺』坐下『叮叮』，畀更多人睇見佢嘅故事。」就決定發起網絡眾籌，希望募集港幣95 000蚊，為「旺旺」喺香港投放1次電車全車身廣告，畀更多人關注動物虐待、流浪動物嘅處境、每一個無法為自己發聲嘅生命。

並且喺短短兩句鐘就已經籌募到足夠嘅款項！

香港愛護動物協會：報警！

而喺2026年7月15號，香港愛護動物協會就喺網絡社交媒體發文，聲言「已向香港警方作出舉報」、「警方回覆表示，將會要求Threads及YouTube移除相關影片」云云。

香港電車：拒絕「旺旺」廣告

根據「Suppaw」展示嘅電車全車身廣告示意圖，佢哋打算沿用佢哋喺2026年7月14號所發佈嘅3幅插畫做主調，加上一啲呼籲關心動物權益嘅口號：

• 牠無法訴痛，但牠真的會痛
• 別讓生命，淪為發洩與取樂的工具
• 讓浪浪離開街頭，走進一個家

然而，2026年7月22號朝早，「Suppaw」表示「文字已獲審批，但旺旺圖像未能通過。因此今次未能按原定計劃坐上電車。」，但重申「如電車或其他廣告未能成功投放，善款將改用於其他合適的動物保護及生命教育項目。」

據悉呢次香港電車拒絕以「旺旺」為主題嘅關注動物權益全車身廣告，理由係；

擔心畫面影響公眾情緒

如果大家睇返「Suppaw」原本想使用嘅插畫圖案；

相信唔少人都會對上述拒絕嘅理由最先嚟一個：

吓？？？！！！

有捐款畀呢次眾籌嘅市民喺接受訪問嗰陣就講到，原本以為香港電車係由法國公司運作（按：香港電車現時由RATP Dev Asia全資擁有，RATP Dev Asia數上去嘅母公司係法國嘅巴黎大眾運輸公司Régie Autonome des Transports Parisiens）就會承襲到法國人嘅風範，理應會支持關注動物權益嘅現代文明準則，無諗過結果會因為幾幅插畫而「落閘」，佢哋形容香港電車呢個決定「涼薄」，員工愧對公司掛有「香港」呢個名。

翻查資料，香港電車有使用全車身廣告為漁農自然護理署推廣公眾教育，而喺2021年香港愛護動物協會成立100周年嗰陣，香港電車都有為香港愛護動物協會嘅籌款活動推出全車身廣告作宣傳，所以話香港電車「唔支持關注動物權益」就顯得講唔通。

至於講到幾幅插畫會點影響公眾情緒，呢啲就真係…（以下內容因不符合相關規定現已被屏蔽）