【港鐵】鰂魚涌發現戰時炸彈 港鐵服務受阻

2025年9月19號1218時，香港警方接報鰂魚涌濱海街16-22號地盤發現1個約1.3米長、0.5米直徑懷疑戰時空投炸彈埋喺地盤嘅泥入面。

因應鰂魚涌地盤發現疑似戰時炸彈，警方喺2025年9月19號夜晚緊急疏散受影響範圍，以便喺2025年9月20號凌晨2時起進行拆彈工作，期間附近範圍人員須按規定撤離。港鐵配合有關安排，喺限時之前撤離車站、隧道，以及相關設施人員。

港鐵表示現正評估有關工作對2025年9月20號列車服務有幾大影響，以作出調動。港鐵重申安全係公司首要考慮。由於港島綫以及將軍澳綫相關路段都途經受影響範圍，預計2025年9月20號港島綫以及將軍澳綫列車服務，會受到顯著以及較廣泛影響。港鐵會喺2025年9月20號頭班車之前作出公佈。港鐵懇請乘客留意有關車務情況，並檢視出行需要。如需出行，請為行程預留充裕時間，並喺可能情況下選取替代路綫，並請留意港鐵透過MTR Mobile、港鐵網頁以及傳媒等發放嘅最新列車服務資訊。

2025年9月20號0530時更新：鑑於事件屬於突發，港鐵表示衷心感謝乘客體諒以及理解，港鐵會與相關政府部門緊密溝通，並盡快交待最新資訊。

2025年9月20號0530時更新：

港鐵表示根據最新評估，將軍澳綫以及港島綫能夠維持正常服務。港島綫列車服務會喺朝早繁忙時間加強，方便市民出街。而為配合警方喺車站外嘅行動，鰂魚涌站A、B出入口暫時關閉，乘客需要使用C出入口。