全民三罷做唔到 收工之後將路堵？

話說原本一班抗爭人士係威係勢咁樣話喺2019年12月9號朝頭早會發動全民「大三罷」，結果當然係喺政府嘅武裝部隊嚴密戒備之下唔成大器。

只不過去到黃昏放工時間之後，有一班不知名人士突然發起堵路行動，其中當然不乏近月嘅抗爭熱點彌敦道亞皆老街交界及附近嘅路口。

公共巴士喺街上面亦都非常容易成為被邀請協助堵路嘅一件工具…方法亦都係一如較早前類似情況咁：被不知名人士喺車頭擋風玻璃大肆噴漆。

中獎包括有一架係九巴嘅41號線巴士，另外有一架係行緊E21號路線嘅城巴機場快線丹尼士Enviro 500 12米雙層巴士（8207，RL2513）。

彌敦道嗰邊派彩嘅就係新巴嘅丹尼士Enviro 500 12米雙層巴士（5537 ，PV2792）。

至於近月不斷以軍法管治香港嘅军政府卫队當然亦不甘示弱，其中有市民影到九巴嘅41A號路線雙層巴士，懷疑被不知名人士撳緊急死火掣之後著唔返偈，卫队就索性撲出馬路中間招呼，巴士上一眾乘客就一哄而散。

各方呢一晚喺西九龍鬧市會唔會有乜嘢特別嘅大規模衝突呢？呢一刻暫時可能大家都要拭目以待。