今個週末，除咗喺D2 Place ONE 二樓舉行嘅「香港車仔展2022」之外，同一條街上面嘅 D2 Place TWO 地下亦都舉行另一部份展覽－「微影車仔展」！
作為「巴士台」，我哋當然介紹下喺車仔展上嘅新款巴士模型玩具啦！喺微影展場最吸引而有關巴士嘅新產品，一定要數展會限定嘅消防處「急救準備教育巴士」－F7801 模型。巴士使用配有 Gemilang Lion’s City DD Facelift 車身嘅 A95 底盤，密封嘅上層車廂內安裝有煙霧裝置，模擬火警發生，以教育市民防災意識。模型模仿巴士披上車身宣傳塗裝初期色彩，上層車頭仍然留有紅色部份，同現時最新塗裝稍有不同。呢款消防處「急救準備教育巴士」模型只會於展會會場、網上商店及澳門門市有售，每部港幣 $110。
筆者自細都係「沙田友」，三十幾年前搭巴士出沙田市中心成日都會見到九巴訓練學校嘅訓練巴士喺沙燕橋上行走，紅白色嘅車身再配上黃色箭咀絕對係獨特嘅標誌。繼之前推出過丹拿A型、圓頂寶，同勝利二型嘅訓練巴士款式外，今次再推出喺訓練車隊中同樣具代表性嘅車型－倫敦寶。四摺式嘅上車門，但附以橫閂將其中一對車門封閉，可以話係呢款車型嘅特色。同樣於展會會場、網上商店及澳門門市有售，每部港幣 $110。但筆者覺得如果上層可以仿效真車，不設上層座椅的話，可能會更加吸引！
講到舊車，今次「微影車仔展」亦都優先發售會員限定嘅電鑊銀色中巴「銀豪」VA60。模型上印有當年中巴同九巴聯營嘅 300 號路線，如果有儲開微影嘅電鍍巴士系列，呢一款新出品就一定唔可以錯過喇！
有關巴士嘅預訂產品方面，就有 BATMAN 蝙蝠俠全車身廣告嘅 BATMAN Bus 模型。車型採用 Enviro 500 MMC Facelift 12.8米，廣告以港島區掛有BATMAN「Grand Panorama」右側廣告嘅真車為藍本，再加以設計成「Super Bus」全車身廣告方式裱裝，車窗窗柱都帶有廣告式樣。模型附有紀念卡及禮盒包裝，預訂價每部港幣 $199。
此外，會場上亦有不同嘅限定版巴士模型玩具出售，包括「九巴重機」系列嘅丹尼士巨龍12米、鑽石酒樓平頂寶、路線264R嘅富豪B7RLE單層巴士等。
除此之外，相信大家都好關注場內有無展出啲新款嘅灰模，或者已經接近生產階段嘅樣辦。唔講咁多，去相先︰
喺 D2 Place TWO 地下展場內，亦有「Rev to Vertex」大帽山荃錦公路為賽道嘅賽車遊戲試玩。一個由香港人團隊開發嘅專業電競賽車遊戲，你唔係唔支持下話？
講返喺隔籬 D2 Place ONE 二樓 The Space 展場嘅「香港車仔展2022」入面，亦都有Model 1 攤位。六款新近推出嘅城巴，以及新巴 1:120 模型，都會喺展場上現貨發售。此外，Model 1亦提供由 $120 到 $200 不等嘅自選模型組合套裝，最附慳到成 $140。仲有巴士站牌磁石貼，買個返屋企貼喺雪櫃都幾過癮㗎！🤣
1 Trackback / Pingback