城巴氫燃料電池巴士 終於可以穿越隧道跨港九新界

氫能巴士乍現香江

講起喺香港現身嘅氫能巴士，2022年6月21號，1架12米版本威馳騰WSD6121BR3FCEV型氫燃料電池雙層巴士由中國福建威馳騰漳州廠房運到深圳皇崗口岸，完成清關手續後，經香港落馬洲管制站再由拖車拖到去城巴西九龍車廠。

2022年7月15號，嗰架威馳騰WSD6121BR3FCEV型氫燃料電池雙層巴士去到城巴柴灣車廠舉行嘅揭幕典禮亮相，當時城巴母公司匯達交通表示，由於香港欠缺氫能汽車相關法例以及加氫站等配套，呢架氫能巴士當時未能領取車輛登記更莫講話安排載客——所以揭幕之後只能夠一直喺城巴西九龍車廠入面閒置。

過咗2個月之後嘅2022年9月16號清晨，嗰架威馳騰WSD6121BR3FCEV型氫燃料電池雙層巴士就由拖車經皇崗口岸拖咗去中国大陸。城巴當日夜晚就透過網絡社交媒體專頁表示，運佢去中国大陸係要進行檢測以及領取各類證書。

左軚單層過客參展

而喺2022年12月「IMXHK 香港國際汽車博覽 2022」西九龍文化區嘅戶外展場就有威馳騰WSD6122BL1FCEV型氫燃料電池單層巴士展出，當時呢架左軚版本嘅氫燃料電池單層巴士純屬過境參展，未算喺香港惹嚟轟動矚目嘅反響。

雙層氫巴捲土重來

2023年10月15號，上面講嘅12米版本威馳騰WSD6121BR3FCEV型氫燃料電池雙層巴士再次被運到港，其後先停泊喺赤鱲角機場島一處維修廠內。其後喺2023年10月25號被安排前往青衣驗車中心進行車輛檢驗，然後嘅日子獲安排喺城巴西九龍巴士廠兜圈，收集行駛數據。

呢架氫燃料電池雙層巴士最終成功喺2023年11月29號取得車輛登記：RP866（之前曾經由城巴嘅青年JNP6105GR型單層巴士（車隊編號：1815、T37）所使用），分配到嘅車隊編號係59200，成為香港第一架成功取得車輛登記嘅氫能巴士。

2024年2月，城巴安排呢架氫燃料電池雙層巴士出街多日模擬行駛啟德新發展區嘅路線，確認巴士性能——尤其續航能力。最終喺2024年2月25號1100時喺啟德（沐安街）首航20號路線。其後行走以下巴士路線：

• 20
• 22M
• 20A

回應政府發展氫能

2024年6月17號，香港特區政府公布《香港氫能發展策略》，提出按照完善法規、制訂標準、配合市場、審慎推進四大策略應對六項技術挑戰，營造有利本地氫能發展的環境。

同日城巴作出回應，指歡迎香港特區政府發表《香港氫能發展策略》，同時表示計劃安排氫能巴士幾星期內首次行駛「過海路線」。

城巴認為制定清晰路線圖以及政策框架，再借鑑中国大陸以及海外營運經驗，加上提供相應財務支援同埋補貼，氫能經濟將能夠快速發展，使香港成為引領全球嘅新能源技術中心。城巴連同股東漢思能源以及善水資本，正計劃喺香港建立頂尖潔淨氫能產業，覆蓋製氫、儲氫、運氫、氫能應用等範疇，並將繼續同政府合作引入新能源基建以及車輛。

政府掃除氫能障礙

為咗拓展使用氫能，機電工程署喺2024年第1季為《香港法例》第51章《氣體安全條例》發出《修訂建議諮詢文件》，以涵蓋規限氫作為「燃料氣體」嘅法理依據。

現時《氣體安全條例》已經有效證明能夠規管石油氣、天然氣、煤氣安全使用。現時香港使用嘅煤氣成分之中大約 50% 係氫，而氫同上述燃料氣體相似，但具有廣泛可燃範圍、低可點燃能量、快速燃燒速度以及可以喺非常高壓力下操作嘅特性。氫比空氣輕，洩漏時能夠迅速消散而唔堆積，不過又由於工作壓力較高，氫好容易被點燃並影響一定範圍嘅安全，因此需要妥善管理設計、運作、維修氫能相關設施，適當培訓操作人員，以確保安全使用氫氣作為燃料。

機電工程署引入新附屬法例——《香港法例》第51H章《氣體安全（氫氣）規例》，而唔修改現有附屬法例（第51A章至第51G章）嘅不同條文。《氣體安全（氫氣）規例》會涵蓋整個氫氣規管架構，包括進口、生產、儲存、運送、供應、使用。透過制訂專門附屬法例，簡化所有規管使用氫作為燃料嘅規例，務求便於引用、妥善實施。

非燃料用途嘅氫目前受《香港法例》第295章《危險品條例》規管，被列為「第2類危險品」，而機電工程署建議修例專門規管氫用作燃料用途（與石油氣、煤氣、天然氣並列）：-

• 用於交通工具嘅燃料電池或其他氫燃料車輛或火車
• 用於建築工地、港口碼頭、機場或其他適當場所使用嘅機械設備
• 用於偏遠地區或其他適當場所發電

隨著修訂《氣體安全條例》中相關條文，加入氫；並引入附屬法例《氣體安全（氫氣）規例》 以規管使用氫作為燃料，涵蓋：-

• 品質
• 供應公司嘅註冊
• 裝置嘅建造以及使用
• 容器嘅類型批准
• 系統嘅使用
• 裝置、容器以及系統嘅投入運作、再度投入運作以及解除運作
• 運送車輛嘅許可證
• 氫燃料車輛維修技工嘅註冊

機電工程署喺修訂相關規管條例之後，訂立咗以下嘅基本條件令氫燃料電池巴士喺香港投入服務掃清重要障礙：-

• 氫燃料電池車輛每個氫氣樽嘅儲存量唔可以超過200公升
• 氫氣樽嘅工作壓力唔超過700 巴
• 運載氫氣嘅運輸車輛就仍然等同其他運載危險品嘅車輛，唔可以使用行車隧道

機電工程署相信修例可以推動發展氫能技術以及商業化途徑，推動香港本地應用氫能。

乘搭氫巴跨過大海

城巴喺2024年7月11號公布，12米版本威馳騰WSD6121BR3FCEV型氫燃料電池雙層巴士會喺2024年7月14號首次行駛穿越行車隧道嘅巴士路線，而被揀中嘅係170號巴士路線。

城巴呢次揀選嘅170號巴士路線係來往華富（中）以及沙田站，其中一個重點在於佢係香港咁多專營巴士路線當中，唯一一條巴士路線每個單向都會經過3條行車隧道——香港仔隧道、紅磡海底隧道、獅子山隧道；另一個重點在於170號巴士路線係1993年「Network 26 新里程」接手前・中華巴士嘅路線之一。

城巴威馳騰WSD6121BR3FCEV型氫燃料電池雙層巴士2024年7月14號首次行走170號巴士路線嘅編定班次開出時間分別係：-

華富（中）	1330時
沙田站	1540時

城巴表示承諾去到2045年全面使用路邊零排放嘅巴士服務公眾，致力令香港達致「碳中和」，量產型嘅氫能巴士性能媲美柴油發動機巴士，適合行駛大部分巴士路線並且滿足作為公共交通工具嘅每日營運需要，所以氫能巴士能夠做到「一換一」方式替代柴油發動機巴士——呢次使用氫能巴士行走170號跨區過海巴士路線，正好顯示城巴決心繼續推動氫能巴士喺香港嘅發展。