响《Toyota Coaster 以為我哋一定無?? 一次過嚟兩代三部》嘅一集節目，相信已經令到唔少人刮目相看、大跌眼鏡甚至大吃一驚，不過坊間總有人嫌該集最少尚欠一部棍波嘅 B80，以至認為我哋(尤其是 Lim 叔叔) 對車款嘅評鑒未夠豐富。而事有湊巧，Uncle Lim 响該集駕駛嘅 Coaster XZB59 嘅車主「豐裕旅遊車服務有限公司」購置咗全新嘅 XZB80 ，而且仲要係棍波。既然咁啱得咁蹺，Lim 叔叔就單人匹馬做返一次純粹 Test Drive，深入一啲分析評鍳最新一代 Coaster。
由爬上司機位開始，能夠調校前後高低嘅軚盤，佢嘅反應已經應該比上一集更加「驚嚇」，因為唔再會「就得到對手，就唔到對腳」，亦可能唔再需要「揸完就要去睇跌打」。
性能操控表現方面，雖然傳動系統同上一代相同，縱然 B80 嘅車身重量較上一代 B59 略有增加，但動力輸出表現對比未必有好明顯嘅分野，不過前懸掛加裝咗防傾桿令到「劈彎」嘅表現更穩定，對於揸乜車都追求「定」嘅 Lim 叔叔嚟講應該相當之滿意。
乘客設備方面，乘客門摩打運作方式有所改良，閂門唔會令乘客或者路人突然被大嚇一跳，足見豐田廠方於呢一代 Coaster 所作出嘅改良可謂照顧周到。只不過閂門耗時嘅變動，也許會令司機感到有丁點唔耐煩。在所謂「機械嘅嘢無絕對嘅答案」嘅理論之下，到底要方便還是提升服務質素，可能真係「視乎你想要乜嘢結果」
只不過，乘客座椅還不是日本原廠出品，而係香港本地廠商嘅出品，到底原因何在？或是既然係 Test Drive，Lim 叔叔到底有乜嘢評鍳見解呢？唔好話我哋唔提醒你哋，小心再跌爛多一副眼鏡！
全集影片，已經上載到 HK Bus Channel 的 YouTube 頻道。
睇完記得點擊 訂閱 SUBSCRIBE ，與及「🔔撳鐘仔🔔」以便可以隨時知道有新影片上架。
特別鳴謝：豐裕旅遊車服務有限公司
Be the first to comment