日本 新潟市役所 都市政策部 都市交通政策課2026年喺新潟站南側進行鉸接式巴士「Twin Kuru」營運社會實驗。
自從2024年3月31號位處東日本旅客鉄道新潟駅南側嘅新潟駅新巴士總站啟用，2年嚟巴士客流量持續成長。當局指呢次社會實驗旨在及早發現問題，促進高運力掛接巴士喺日常營運，以冀充分發揮作用。當局希望透過有效利用掛接巴士，增強新潟市南北城區之間聯繫，提高公共巴士營運效率，為市民提供更安全嘅交通選擇。
社會實驗第1階段：唔載客嘅「試運行暨熟習駕駛」
- 路線：新潟站 ←→ 新潟交通南站
- 營運期間：2026年4月16號（星期四）到5月下旬
- 事項：確認巴士埋站位、確保營運安全、向公眾以及乘客推廣等
「巴士測試」
當局指「巴士測試」係為咗確認巴士埋站位、營運安全、對公眾交通嘅影響，旨在確保巴士安全、可靠運作嘅必要步驟。當局表示呢項「巴士測試」係基於「弁天線」沿路嘅巴士站位原本設計只喺畀普通路線巴士埋站，所以兼容唔到掛接巴士，所以必須測試確認實際埋站位、掛接巴士埋站對其他車輛嘅影響以及安全措施。當中主要有3項：
- 掛接巴士喺部分巴士站埋站位置可能會令巴士車身凸出去行車線上
- 由於每個巴士站形狀各有唔同，當局要喺每個巴士站檢查埋站位距離行人路有幾遠
- 確保輪椅使用者能夠安全上落巴士而檢查掛接巴士嘅斜板喺埋站後可以用得到
「巴士測試」結果
- 部分巴士站當掛接巴士埋站後，巴士站後方嘅車輛需要短暫滯留
- 主要涉及⑤紫竹山（下）、⑥弁天橋（上）、⑦原の台（下）呢3個巴士站
- 附圖係⑤紫竹山（下）巴士站嘅情況
- 因為呢個巴士站接近新潟繞道以及紫鳥線嘅交叉路口，每日交通都好繁忙，掛接巴士埋站嗰陣凸出行車線會明顯阻礙車流
- 為咗確保一般車輛通行得較順暢，當局決定修剪樹木，檢查確保安全運行後，令掛接巴士可以更接近行人路埋站，避免阻礙車流
- 其他巴士站
- 雖然喺其他巴士站，當掛接巴士埋站嗰陣有時係要停喺巴士站外嘅行車線，但並未阻礙車流
- 附圖係⑨ 山形小學前巴士站嘅情況，雖然掛接巴士埋站嗰陣凸出到巴士站外，但對車流幾乎無造成影響
- 當局會繼續檢查呢種埋站方式係咪安全
社會實驗第2階段：載客營運測試
- 營運期間：2026年6月1號（星期一）到7月下旬
- 路線：長潟線S61號巴士路線，新潟駅 ⇒ 南部営業所
- 班次：平日0858時開車，每個載客營運測試日1班
- 事項：確認乘客上落車情況、營運安全檢查、對一般交通嘅影響等
新潟市役所表示喺呢個財政年度計劃計劃進行更多實驗營運，並且提醒公眾注意，「永旺購物中心新潟南」巴士站嘅位置只會喺進行社會實驗服務期間嘅載客營運測試遷移。
短評
受制於日本《車両制限令》對一般制限値嘅規定，日本行駛嘅車輛高度上限係3.8米，加上日本路線巴士運作上係乘客喺車廂移動時巴士需要停定，喺唔修改法例嘅情況下，雙層巴士難以用作路線巴士。
面對公共巴士司機短缺、乘客增加，日本唔同地方為咗改善運力都有嘗試唔同嘅取態，包括轉變上落車模式、引入自動駕駛巴士、改用掛接巴士等。
當中最值得留意嘅係，日本當局往往會安排多重社會實驗，由點行車到乘客點睇都有事先收集數據，呢種「麻煩嘅固執」其實先至係「為人民服務」。
Be the first to comment