曾經先後喺愉景灣同埋珀麗灣試車，亦曾經畀香港專營巴士公司參觀嘅Wrightbus Electroliner電動雙層巴士，2026年3月4號喺青衣運輸署車輛檢驗綜合大樓，成功通過得到「車輛類型核准證明書」嘅測試（即係「車輛類型評定」）其中一環——穩定性測試（即係「傾側測試」）。
每款巴士型號都需要運輸署作出審批，巴士製造商或者巴士公司需要為每款巴士型號提交「車輛類型評定」嘅申請，運輸署會檢定新巴士型號係咪適合喺道路上使用，新巴士型號需要通過「車輛類型評定」之後，先至可登記以及領牌。
穩定性測試係香港每一款巴士（唔係只有專營巴士而係「所有巴士款式」）喺得到「車輛類型核准證明書」而獲准做後續嘅「登記前檢驗」以及「領牌」 投入市場之前，必須通過嘅驗車項目。
根據《香港法例》第374A章 《道路交通(車輛構造及保養)規例》第55條「穩定性」所述：
- (1)雙層巴士的穩定性，須達到當在巴士內正確的相對位置放置重物，以代表駕駛人及只是上層滿載的乘客時，即使放置車輛的平面向任何一邊傾斜至與水平綫成28度，發生翻車點仍不會超越。
- (2)單層巴士及小型巴士的穩定性，須達到當在車內正確的相對位置放置重物，以代表駕駛人及滿載的乘客時，即使放置車輛的平面向任何一邊傾斜至與水平綫成35度，發生翻車點仍不會超越。
- (3)就進行穩定性測試而言，用作防止巴士或小型巴士的車輪向側滑移的任何擋塊的高度，均不得超過放置車輛的平面在傾斜前，與按照本條的規定，在車輛內加上重物後最接近該平面的車輛的輪輞部分的距離的三分之二。
- (4)就本條而言，57公斤當作為代表一個人的重量。
面對Wrightbus Electroliner電動雙層巴士，依照相關法例要求，驗車中心嘅工作人員要首先喺巴士上層所有座位以及駕駛座位，各放置1堆等同57公斤重嘅砝碼（唔係一塊過57公斤），模擬巴士上層所有座位各坐咗1名乘客，而下層除咗駕駛座位坐咗1名司機之外就完全無乘客嘅狀態。
「過磅」確認車輛重量之後，巴士就會駛上「穩定性測試台」，由驗車中心嘅工作人員將測試台向側調校到傾斜28度。
巴士需要喺測試台傾斜28度嘅情況下「無出現翻倒以及能夠停留喺平台」，最簡單嘅理解就係「咁多個轆都仲掂住地…成架車無瞓落旁邊條欄」，而通過呢個測試嘅另一個要求係「左右兩邊都無出現翻倒」，所以要「斜完左面要擰埋個右面斜埋」。
成功「過關」！
咁就證明嗰款巴士能夠喺正常情況下穩定而安全咁轉彎
當然，Wrightbus Electroliner電動雙層巴士喺設計上電池平均分佈喺「車陣」（即係車廂底部），所以Wrightbus Electroliner電動雙層巴士進行穩定性測試相比無咁多重物放喺車底嘅燃油巴士可以話係「容易啲合格」。
不過，除咗穩定性測試之外，Wrightbus Electroliner電動雙層巴士仲有進行一系列其他測試，先至會獲得「車輛類型核准證明書」，而為咗確保巴士喺正式投入服務之後，整體表現能夠迎合營運環境嘅實際需求，佢亦都要掟去畀唔同有興趣嘅營運商「玩返一輪」先至知道有無得到青睞。
Be the first to comment