【日本】北海道機場巴士起火 司機乘客全員無恙

當地時間2025年12月17號1140時左右，一名目擊者報案指喺日本北海道道央自動車道惠庭交流道以及千歲交流道之間，有一架巴士起火。

當地警方以及消防局出動咗19架消防車以及其他緊急車輛，消防員用咗大約一個半小時​​將火勢完全撲滅，起火巴士被焚燒到骨架外露。

起火嘅係北都交通一架機場巴士，當時正係由札幌市區開去新千歲機場，巴士上面除咗1名司機之外，載有40名乘客，全部及時疏散，無人受傷。

現場消息指巴士行駛到千歲-惠庭系統交流道附近時開始冒煙，隨後起火。有目擊者接受當地電視台記者採訪時表示，起初佢哋有嘗試用水滅火，但係火焰越燒越旺，並且有3~4下爆炸聲，火勢蔓延到車頂，熊熊燃燒。

呢架機場巴士嘅營運商北都交通回應當地傳媒查詢嘅時候表示，巴士司機喺行車途中望向睹後鏡發現車尾冒煙，於是靠左停低巴士，疏散乘客。由於巴士司機及早發現問題，40名乘客唔止安然撤離，仲嚟得切拎埋行李，喺公路上等到安排嚟嘅後續巴士上車繼續行程，只係較原定時間遲咗大約一句鐘到達新千歲機場。

受呢次事故影響，道央自動車道去苫小牧方向由千歲交流道到惠庭交流道、去札幌方向由千歲惠庭系統交流道到千歲東交流道，封閉咗大約5句鐘。

對於起火原因，當地警方以及消防局表示仍需調查，而北都交通就指巴士喺發車前嘅檢查中未有發現任何異常。