【香港電車】值得去報海關嘅2024年版電車雪糕月餅…

是咁的，2024年7月4號，Häagen-Dazs™喺佢哋嘅社交媒體專頁發出咗一個廣告，當中內文講到：

【📣Häagen-Dazs™聯乘香港電車120周年雪糕月餅💝 仲有限時會員驚喜聯賞⁉️】 今個中秋，想跟隨月光軌跡，品味月圓相聚之旅？適逢電車創立 120 周年，Häagen-Dazs™同香港電車首度聯乘🎊，推出特別版雪糕月餅 —「Moonlight Trail 星旅．尋月」，帶大家漫遊中秋星月🌕！每盒除咗有4款經典口味雪糕月餅，仲隨盒附送限量版 Häagen-Dazs™ x 香港電車1/120電車模型一部，極具收藏價值🤩 數量有限，各位電車迷一定唔可以錯過🌟！

其中喺Häagen-Dazs™自家嘅官方購物網站上面就有以下呢一啲嘅宣傳圖片：

就咁睇圖係咪覺得幾好呢？

根據官方所講嘅售價就係港幣598蚊，號稱可以用早鳥優惠74折購買，即係大約港幣443蚊，包括一盒4件指定口味雪糕月餅，包括：士多啤梨、比利時朱古力、呍呢嗱、焦糖脆餅（各1件） 隨盒附送限量版 Häagen-Dazs™ x 香港電車1/120電車模型（一部）

如果你真係鍾意香港電車嘅話，買嚟支持下香港本土品牌，聽落都唔錯呀！但…

世事邊有咁美好㗎！

首先，起初有購買咗Häagen-Dazs™聯乘香港電車120周年雪糕月餅券嘅市民，發覺去領取呢款雪糕月餅嘅時候，有令人感到極其震撼嘅產品質素問題！

官方宣傳入面嘅「極具收藏價值」香港電車1/120電車模型唔單止質素參差，更加出現缺少真車應有必須部件嘅情況，大批顧客都有以下評價：

「呢架嘢連福華街10蚊冒牌貨都不如」

另一方面，如果你認為「是但啦！嗰架模型車都係畀小朋友攞嚟當玩具亂咁掟嘅啫」、「反正自己買到早鳥優惠都可以接受吖！」——咁呢度要好遺憾咁通知你一個消息：

如果你去買現貨
其實只係需要港幣268蚊

睇到呢度開始有啲火滾呀？未完㗎！

如果你事先已經買咗呢一款Häagen-Dazs™聯乘香港電車120周年雪糕月餅券，諗住滿心歡喜咁樣去佢指定嘅地方換領雪糕月餅，或者你會後悔唔記得帶埋大大把刀去斬人…因為Häagen-Dazs™結果係會畀盒咁嘅嘢你：

Hi Auntie！
唔係話有特別設計嘅香港電車月餅盒嘅咩？！

如果你仲想同Häagen-Dazs™理論嘅話，根據Häagen-Dazs™嘅職員所講：

咁你要唔要吖？
呢盒係六個裝
益向左走向右走咗你啦！

（真實對話）

但心水清嘅朋友應該都會明白，一個供應商收咗你錢然後畀唔到原本應該畀嘅貨畀你，唔係以為畀多咗數量嘅其他貨就叫做「益咗個客」。

就好似今次Häagen-Dazs™聯乘香港電車120周年雪糕月餅，其實係一套完整嘅組合先至叫做「跟啱規矩賣嘢」——尤其Häagen-Dazs™畀唔返當初開售嗰陣時宣傳嘅特色香港電車包裝，呢個已經係嚴重違反商品說明，不論係Häagen-Dazs™定係香港電車，依家咁樣出貨好明顯係欺騙咗顧客，因為香港電車120週年特色包裝都係呢批雪糕月餅嘅一個重要組成部分。

咁樣呃客樣衰咗啲喎！

24小時舉報熱線(852) 2545 6182