MAN TGE 低地台小巴抵港

農曆新年大除夕，本港小巴市場平地一聲雷，因為德國 MAN 運來一部已經噴好咗專線小巴顏色嘅 TGE 低地台小巴。

撇除仲喺出牌前 (可能永續) 反覆驗車階段嘅 Mellor Orion 或 Apex Mini，「低地台小巴」呢種車除咗本台有影片節目介紹過嘅 平治 Sprinter EVM 車身改造 嘅嗰一部，再頂多加埋因為經常要等待零件維修，導致「擺多過行」嘅 Optare Solo 中型巴士之外，坊間都應該無人期待會有新車款；甚至宏觀的整個小巴市場未必預計會再有新牌子加入戰團。故此該可以解釋得到呢部車被「野生捕獲」之後坊間反應之大，就連代理 MAN Truck & Bus Hong Kong 都覺得反應大得有點出奇。

初步聯絡過代理溝通，佢哋話呢部車以至整個 TGE 小巴系列都籌備咗一段日子，希望盡量做足準備以能予業界同廣大市民有正面嘅印象，所以都感謝「捕捉」到部車嘅朋友們使坊間得知部車已經抵港。

講返部小巴。其實 MAN 廠方係响 2018年 IAA 及 2019年 Busworld 車展上發表名為 TGE City 低地台小巴，連同 TGE Coach / Intercity 成為一個完整嘅小巴產品系列。通稱高地台嘅車款响2020年開始正式量產，及有授權改裝廠嘅出品，陸續响歐洲市場出現。

至於 TGE City 就久未見普及，也許是低地台佈局有更複雜技術要求。因此呢部專綫小巴可能係 MAN 車廠「全球首發」，意味住廠方對香港市場嘅重視程度非常高。

規格方面，機械部份與現時香港銷售嘅 TG-E 貨車/多用途商用車一樣，排氣量 2.0L (1968cc) 直4 柴油引擎，動力輸出 177hp / 410Nm；ZF 8前速自動波箱。設計總重 (GVW) 5.5噸。

車身尺寸長7.4m，闊2.0m，連頂置冷氣高3.0m，用盡本港最新法例嘅上限。載客量原廠設定為16座位+1輪椅泊位。

至於會否有詳細測試介紹，請留意本台嘅消息公佈。不過可以「事先張揚」，講咗 MAN 香港有「TG-E 小巴系列」，早陣子已經有一部學校私家小巴抵港。

即係點？Bookmark 我哋網站同訂閱 YouTube channel 就會知道答案囉。

特別鳴謝：MAN Truck & Bus Hong Kong Limited