講到「搭火車」，對香港嘅年輕一輩嚟講，如果搭慣咗依家嘅港鐵，可能就會習慣「電氣化火車」模式嘅列車，呢次報道要講嘅國營「臺灣鐵路管理局」（臺鐵）「復興號」，其實就係類似香港出現「電氣化火車」之前，「九廣鐵路」嘅嗰一種運作方式——利用機車頭帶動一啲無動力嘅客車車卡——如果一時間唔知係乜嘅話，不妨去大埔墟嘅香港鐵路博物館，參觀當中收藏嘅一啲香港過去使用過嘅火車車卡，或許就會明白多少少。
背景
1970年代，時任行政院院長蔣經國為咗改善臺灣基礎設施以及產業升級，推出多項重大基礎建設工程，史稱「十大建設」。
臺灣政府為處理飊升嘅鐵路客貨運量，因此喺1973年起計劃鐵路電氣化工程，首先為西部幹線縱貫線全線（基隆←→高雄）架設長達1153公里嘅架空電纜，以一路施工、一路營運嘅方式，分段輸電通行，1979年6月27號全線通電試車完畢，1979年7月1號喺高雄車站舉行通車典禮，1979年7月2號西部幹線縱貫線全線鐵路電氣化正式啟用。
臺鐵自從搞「鐵路電氣化」之後，由於投資咗好多錢落電網同軌道工程，搞到無辦法同時補充大量電動列車，為咗避免完成「鐵路電氣化」之後出現「有路無車」而影響整體經濟效益嘅「白痴」情況，因此臺鐵喺1979年度掟份預算去臺灣省議會審查嗰陣就提出買多「200卡客車」嘅計劃。
招標
最初臺鐵嘅規劃就係買80卡「莒光號」嘅嗰一種有冷氣客車車卡，而其餘120卡就係「光華號」嘅嗰一種無冷氣客車車卡。
但係臺鐵考慮到當時公路客運已經開始流行「冷氣巴士」，臺鐵如果仲係用無冷氣嘅客車車卡就即係「無得同人哋鬥」，所以決定將無冷氣嘅「對號快車」提升為「冷氣對號車」，將原本諗住買無冷氣版本嘅120卡都改晒買有冷氣版本。
「200卡客車」招標有美國巴德公司（Budd Company，2014年已經申請破產，依家只係淨低派退休金嘅空殼）同埋臺灣唐榮鐵工廠報價：巴德公司提議用不銹鋼車身，唐榮鐵工廠就提議用碳鋼車體或者以日本ALNA技術造嘅不銹鋼車體兩種方案。
不過因為巴德公司要求實際付款嗰陣要比對簽約時嘅漲價指數加價，結果超出臺鐵能夠管控，加上要配合政府上級指示「國車國造」，決定由唐榮鐵工廠承包晒200卡客車車卡。
投入服務
1980年4月底，臺鐵為了想「冷氣對號車」趕得切喺暑假投入營運，「長官意志」咁要求唐榮鐵工廠暫停製造「莒光號」所用嘅客車車卡，務求令「冷氣對號車」提早投產並且趕工——「長官意志」原本想1980年6月就開始交車，但現實就因為準備唔切原料而必須延誤——1980年7月中旬先至生產到首批15卡臺製「冷氣對號車」客車車卡。
1980年7月16號臺鐵就即刻用呢批「冷氣對號車」客車車卡混集比較高級嘅舊「莒光號」客車車卡以混合編組方式投入服務，以「台北←→花蓮」同埋「台北←→高雄」各試開4班次列車。
1981年3月1號，臺鐵將呢啲「冷氣對號車」正式改名做「復興號」，以電力機車或者柴電機車牽引——但要去到1981年12月28號，120卡唐榮鐵工廠製造嘅「冷氣對號車」客車車卡大部分完工後，廢除車卡混合編組，先至正式獨立為「復興號」——車身色彩亦改為白色加藍色。
批評
隨著臺鐵發展，調整列車等級、更多電動列車投入服務，對於一般通勤嚟講，用機車牽引嘅「復興號」就算唔係「站站停」，面對加速度同速率都較高嘅電動列車，「復興號」嘅行車時間都無乜特別優勢，加上座椅唔係特別闊落又要有啲會「面壁」無得睇風景，嚟到21世紀就自然搞到乘客無乜好感。
退役
當臺鐵多款新型電動列車喺21世紀陸續投入服務，用機車牽引嘅「復興號」明顯已經落伍，難免要退下火線。
「復興號」早喺2010年就「第一次走入歷史」，不過之後以各種加班、加班轉正班嘅方式「復活」，到2022年就終於開出最後一班車。
臺鐵局長杜微表示，為提升車輛維修、票務、對不同需求旅客嘅服務，臺鐵正簡化「列車車種」，主要淨返3大項：
- 城際列車
- 區間列車
- 觀光列車
為此臺鐵喺2022年3月底再次調整時刻表，淨低嘅「復興號」班次會有以下改動：
- 605次、611次、642次全數改為用電動列車（EMU）行駛嘅區間快班次
- 691次改用柴油列車（DMU）行駛嘅「自強號」班次
臺鐵最後一班「復興號」係2022年3月29號嘅605次，為咗紀念呢一班車，臺鐵仲專誠喺2022年3月28號9點喺臺北車站同花蓮車站發售150套「復興號末班車紀念套票」，每套新臺幣150元，包含「花蓮至新城」嘅「復興號」名片式車票1張，背面有末班車座位號碼，吸引好多鐵路迷漏夜排隊，其中喺花蓮車站排頭位嘅更加係提早22句鐘到車站守候。
臺鐵最後一班「復興號」——2022年3月29號605次——由車頭掛上特製「復興號2022.03.29 花蓮開往樹林605車次 最後列車」紀念牌嘅「E416」號美國通用電氣運輸電力機車牽引，0605時由花蓮車站出發，至於抵達終點新北市樹林車站嘅時間，根據紀念套票上所印嘅時間就係0959時，根據樹林車站嘅報站顯示屏就係0956時（晚5分）。
到達樹林車站後，負責臺鐵最後一班「復興號」嘅列車長、姓莊嘅司機員、一同搭呢班車嘅臺北站長胡詠芝等臺鐵員工，都獲臺鐵局長杜微親自頒發有杜微親筆簽名嘅「復興號末班車紀念套票」。
今次臺灣北迴綫「復興號」退役後，雖然票價仲喺系統入面保留著，但能夠「劃位」、有好多「通過站」嘅「復興號」，今次真係「走入歷史」。
同樣係由臺鐵搞嘅企劃，相比「臺鐵EMU1200型電動列車」退役係用「貼紙」呈現紀念車頭牌，「復興號」可以製作實際嘅牌掛喺機車前面，顯得地位唔同，更特別嘅係連列車編組個尾都掛咗個牌——而605次好早開車，工作人員必定需要喺前一日就掛好個牌——據講喺2022年3月28號中午先完成機車嗰塊，至於編組個尾就要等到611次「復興號」夜晚返到花蓮「收車」之後先至搞到，真係辛苦晒相關嘅工作人員。
可惜嘅係，因為「復興號」相關車卡老舊，後續將直接報廢。
臺鐵局長杜微表示除咗配合新車投入服務，臺鐵亦要喺「公司化」前就要達成既定嘅車種簡化階段目標，2022年內陸續汰除折疊門「莒光號」、舊式DMU「自強號」等車款——未知身處香港嘅鐵路迷又有無機會「通關」去到臺灣參與「送殯」呢？
Be the first to comment