愉景灣再測試電動巴士 今次係比亞廸…

位處大嶼山嘅大型私人屋苑「愉景灣」，為區內居民提供交通服務嘅愉景灣交通服務喺2014年曾經利用政府基金贊助，引入過2架華夏神龍（國際）有限公司生產嘅沂星SDL6105EVG型電動巴士作居民巴士之用，然而嗰2架電動巴士經常故障，出車率表現差劣，難以應付日常營運，未能達至日常營運要求。

環境保護署喺2020年11月公佈嗰2架電動巴士最終測試報告，指愉景灣交通服務非常唔滿意嗰2架電動巴士嘅表現。

不過，即係咁講，同嗰個報告事隔僅僅1年，蒞到2021年11月，愉景灣交通服務就拎到1架比亞廸J6小型電動巴士嚟「試車」，據講係行6號路線——而原本呢條路線都係用豐田Coaster或者三菱Rosa。

根據「比亞廸日本」嘅資料：

• J6係因應使用小型巴士嘅需求而開發，屬於低地台規格，最多可以載29名乘客
• 比亞廸號稱擁有自主電池製造技術能力，J6小型電動巴士每次完整充電後可以行駛150~200公里
• J6利用電池驅動電動機，相比油渣引擎嚟講，大幅降低咗行車時噪音，並且避免直接喺馬路向路人排放廢氣

現時喺日本京都嘅京阪巴士就有用緊比亞廸J6電動巴士，嗰邊反應唔錯嘅，不過大家都明啦：

• 「外銷樣板」質素通常都靚好多
• 日本買貨有要求
• 日本人維修保養水準高

香港邊有得比！