【今日提提你】東鐵又無紅磡←→旺角東服務

因應沙中綫過海計劃中牽涉嘅拆除原有路軌、鋪設875米路軌、安裝1.3公里架空電纜工程，2021年1~10月期間（除咗3月），每個月會最少有1個指定星期日，港鐵東鐵綫來往紅磡站至旺角東站列車服務會暫停服務。

至於2021年7月份，港鐵會有特別安排，1個月內有2個星期日暫停相關服務，第1個星期日就選擇咗：

2021年7月4號

由首班車起直到服務完結，東鐵綫來往紅磡站同埋旺角東站嘅列車服務暫停，而港鐵一如以往幾次咁，會提供免費接駁巴士來往紅磡站同埋九龍塘站，但唔停旺角東站。

由於接駁巴士受路面情況以及運載能力限制，整體車程預計時間將會比平日長咗。

今次係屯馬綫全綫通車後首次暫停東鐵綫來往紅磡站至旺角東站列車服務，港鐵有相應更新指示：

不過，有消息指今次有可能係東鐵綫來往紅磡站同埋旺角東站嘅列車服務暫停嘅尾聲，相信相關工程比原本預期快完成。然而另一方面，有業內人士指港鐵有消息話東鐵綫過海段「預計要去到2022年第3季啟用」，相對較早前嘅公佈略有延誤。

消息指以目前工程進度，新軌道接駁工程主要項目好快搞得掂，只不過乘客幾時可以直接乘搭東鐵綫直接過海，問題出喺列車重新編組嘅進度。