【九巴限速】收費通道行廿五？ 安全意識有偏誤！

是咁的，作為一個 GreenRoad 嘅資深用家，判官我早喺九巴採用呢套系統之前兩年已經用緊，所以對呢套系統嘅熟悉程度，分分鐘仲深入過九巴班巴士車長。

簡單咁講， GreenRoad 呢套系統，本身係用嚟紀錄巴士車長嘅駕駛習慣，從而為巴士車長喺每個車程提供一個「分數」，並且提醒巴士車長喺整條路線嘅邊啲位置曾經揸到「耷、簁、逴」，務求令車長自發改善，以提高自己嘅駕駛技術。

而根據九巴2021年3月22號發出嘅一張內部通告，以安全總監黃祥明嘅名義提示一眾巴士車長，公司曾經喺2021年2月8號發出通告，提醒各巴士喺通過隧道收費通道嗰陣，需要將巴士減速到唔快過每小時25公里先至算係「安全駛過」。

今次新通告話明發覺有巴士車長用「不當車速」駛過收費通道，所以要用 GreenRoad系統嘅黃燈同紅燈提醒返巴士車長注意返「安全車速」咁喎。

只不過咁，香港嘅收費行車隧道大都容許巴士以時速70公里行車、喺隧道口收費廣場減到時速50公里，依家九巴話要巴士去到收費通道就收慢到時速25公里，但又好似唔記得之後係要再加速返去時速70公里駛入連接隧道嘅公路――而重點係一連串減速同加速係要喺大約200米距離之內完成――以判官我嘅經驗，咁樣又耷車又畀油嘅揸法，GreenRoad本身綠燈都變閃黃閃紅啦！

更加重要嘅係，咁大架巴士埋到去自動收費通道嗰陣突然減速，後面其他車輛喺睇唔到前面交通情況下都被逼突然收慢，除咗會造成收費廣場一堆無必要嘅「慢車」之外，呢種快慢落差仲好有可能會導致尾隨車輛收掣不及而發生車禍！

雖然，通告末段用粗體字講明「相關紀錄不會用作紀律處分」，但係又有幾多巴士車長會相信資方呢個講法呢？

又其實… ╮(╯_╰)╭