是咁的，運輸署喺2020年8月28號通知區議會，指九巴會喺2020年9月1號派工程人員到原本嘅「紅磡碼頭巴士總站」，拆除兼回收所有車坑嘅巴士站上蓋，整項工程預計需時3日。
考返少少古呢~因為呢個巴士總站身處紅磡碼頭側邊，所以一般叫做「紅磡碼頭巴士總站」――不過以官方角度嚟講，呢個巴士總站應該叫做「紅磡灣填海區巴士總站」。
呢個巴士總站係喺1990年興建，到1991年3月9號啟用，不過巴士路線係去到3月17號先至進駐，一直服務公眾直到2019年1月12號正式停用。
相關公共交通服務搬到2019年1月11號18時啟用、位處紅磡灣紅鸞道38號香港嘉里酒店基座嘅「紅磡（紅鸞道）公共運輸交匯處」。當時有指原有「紅磡碼頭巴士總站」地皮暫定會改造休憩用地，以回應附近居民嘅訴求。
「紅磡碼頭巴士總站」停用之後，有關方面已經喺連接嘅車路上面放置「水馬」、混凝土植物盆等障礙物，唔畀車輛入去。
不過，大家都估到，既然原有巴士總站無咗，淨低塊地皮又無相關機構出嚟管理，擺嗰少少嘢又點阻擋到居民「善用」空地呢？
附近居民一直認為休憩用地不足，「無皇管」之下，眼見有咁大塊地皮「梗係唔好嘥」――抖涼、踢波、玩滑板、踩單車…
當附近居民「約定俗成」咁直接用咗原本「紅磡碼頭巴士總站」塊地皮當做自訂嘅「休憩用地」，難免就覺得「好應該吖！」
所以呢~當去到現場採訪拍攝嘅時候就有咁情況：
「呢度有乜好影呀？」 『其實呢度啲巴士站上蓋過兩日就拆...』 「DKLM吖！咁多細路嚟玩，邊隻羚羊話畀佢哋拆嘢？」 『咁本身塊地都唔係休憩用地嚟...』 「我唔向左走向右走理，總之依家我哋嚟開畀小朋友玩，有蓋有櫈遮吓，DKLM，邊個hihi畀佢哋拆？」 『但其實啲巴士站上蓋係九巴資產，畀巴士站嘅乘客用，依家無咗個巴士站，九巴收返走屬於自己嘅資產有乜問題？』 「hi！反正都落晒地，咁大工程搬走嚟做正義的事咩？」 『又咁講喎，依家又唔係巴士站，九巴又無必要冒險留低啲屬於九巴嘅巴士站上蓋，維修係九巴責任、整親人又係九巴責任，正常都會無謂冒風險啦！』 「wow！收咁向左走向右走多車費，留返幾個蓋嚟用都唔得？」 『吖！你有無招呼吓家維邨啲街坊上你屋企玩？』 「我屋企係我自己嘅，點解我要咁傻的嗎招呼人哋玩？」 『咁點解九巴要招呼大家喺佢自己嘅呢啲巴士站上蓋嘅地方玩？』 「......」
附記：
當區區議員早前已再搵過政府相關部門，查詢原本嘅「紅磡碼頭巴士總站」騰空後，嗰片土地真係會有乜發展計劃，但現階段政府相關部門表示「仍然未有確實計劃」。
Be the first to comment