【港鐵】屯馬綫6月底通車 有乜好期待呢？

建築期長達9年、涉及多宗偷工減料醜聞、擾攘多時嘅屯馬綫（屯門←→烏溪沙），喺2021年5月2號搞咗大規模「試車」之後，似乎真係「準備就緒」喇！

【港鐵】為配合屯馬綫試車 5月2號推遲兩綫頭班車

2021年5月28號，香港政府連同港鐵正式對外公佈，港鐵屯馬綫謹訂喺2021年6月27號全綫通車，原本已經運行緊嘅屯馬綫一期同埋西鐵綫會直通，大部分列車將會直接來回屯門←→烏溪沙，中途新增嘅有宋皇臺站、土瓜灣站，以及何文田站、紅磡站內嘅新建月台――27個車站嘅屯馬綫會成為香港境內最長嘅鐵路綫。

而為咗配合屯馬綫全綫通車，紅磡站會率先喺2021年6月20號轉換月台，屆時東鐵綫乘客需要由現時東鐵綫月台，前往新屯馬綫月台轉車。

屯馬綫全綫通車可以大幅縮減乘搭港鐵來往鑽石山、何文田、紅磡等車站嘅時間：

• 原本乘客來往鑽石山站同埋紅磡站，需要喺九龍塘站由觀塘綫徒步轉乘東鐵綫，全程耗時大約20分鐘；但屯馬綫直通之後就可以無需轉綫，耗時只係大約10分鐘。
• 乘搭港鐵來往紅磡站同埋何文田站嘅話，亦毋須局限喺東鐵綫轉觀塘綫――單純使用屯馬綫耗時只係大約8分鐘。

根據港鐵路公司草擬嘅運作時間表，屯馬綫喺繁忙時間大約每3分鐘1班車，而日間非繁忙時間就大約每4~5分鐘1班車：

• 紅磡站經屯馬綫北行去烏溪沙站，每日頭班車0604時開出，尾班車翌日0047時開出；
• 鑽石山站經屯馬綫南行去屯門站，每日頭班車0605時開出，尾班車翌日0022時開出。

港鐵資料指，屯馬綫絕大多數班次將會係行晒屯門←→烏溪沙全程，繁忙時間亦未有安排開出短途列車。

雖然港鐵未有喺記者會宣布調整屯馬綫一向被認為貴過港鐵其他路綫相近行車距離嘅正式車費，但香港政府宣布會推出折扣優惠，吸引乘客改用新路段：

• 喺宋皇臺站、土瓜灣站、顯徑站或啟德站來往其他車站，使用成人八達通，每程享有1 元車費扣減、使用其他八達通，每程享有0.5元車費扣減；
• 小巴、巴士嘅特別轉乘等優惠會延續至2022 年1 月1 日；
• 現時票價優惠同埋推廣計劃，都會涵蓋新車站。

根據往績，相信政府好快就會用行政手段刪減九龍城、土瓜灣一帶嘅公共巴士服務――而一批政府部門亦會陸續由原本嘅港九鬧市地段搬去屯馬綫沿綫，咁樣「谷人流」確實無其他公共交通機構鬥得贏。

屯馬綫將成為港鐵首條提供車廂載客情況顯示嘅鐵路綫――乘客可以透過顯示屏睇晒每卡車廂，有得揀空間較多嘅車卡上車――應該絕對唔係用嚟監察乘客嘅！

究竟開新鐵路綫係咪真係令市民去街「多咗選擇」？定係令市民可以搭嘅交通工具向單一項目傾斜？

相信有用心經歷過近年鐵路新綫通車嘅話都「心裡有數」！

順帶一提，2021年6月27號除咗係港鐵屯馬綫全綫通車之外，亦係香港山頂纜車第5代車卡最後載客之日，屆時大家唔好忘記咗呢位30幾歲嘅「香港老臣子」！

【車輛講故佬】山頂纜車下半年停駛 期望2022年煥然一新