是咁的，因為新型冠狀病毒（武漢肺炎）不斷擴散，香港政府藉「抗疫」之名，頒令由2020年7月29號開始全日都唔准食肆提供「堂食」服務，喺禁令第一日已經搞到「民不聊生」…而幾間巴士公司亦迅即作出應變。
其中九巴決定由7月30號開始，12:00~14:30喺以下3個有蓋巴士總站劃出特別位置，擺啲櫈畀公眾可以除低口罩食飯，而且任何人都可以使用：
- 佐敦（西九龍站）巴士總站
- 屯門站總站
- 大圍站總站
本台派員喺7月30號中午去到佐敦（西九龍站）巴士總站視察，見到九巴早就裝嵌咗一啲新簇簇嘅櫈畀市民使用，仲安排咗義工在場協助有需要嘅市民。
齋係得櫈好似仍然唔夠方便？唔使擔心，當區3位區議員亦借出咗多張摺枱，再加埋紙皮做「間板」，等市民可以更好咁喺「無得堂食」嘅日子食個飯。
至於有一樣肯定好多人講嘅：「大佬，巴士總站就算叫做『有瓦遮頭』都係好__熱㗎喎！」
呢樣嘢當然九巴都有考慮埋啦！九巴有搵工程人員喺現場拉電駁風扇，起碼畀大家有多少少風，吹散熱力。
返去重點：用家…
老實咁講，佐敦（西九龍站）巴士總站所處位置就確實唔算人氣鼎盛㗎喇，但見到有零星市民能夠有一個「比較似樣」嘅地方可以坐低食飯，哪怕只係好少人用得著，始終都叫做「幫到人」吖嘛！
近來話新型冠狀病毒（武漢肺炎）每日都過百個案咁增加，清潔當然係好重要，九巴擺咗呢個「巴士總站食飯區」出嚟就唔係得個擺字，有安排埋人手做清潔㗎！
政府對社會不仁，唔代表大家就必然不義，今次等大家每人行多一步，希望幫到公眾可以食返一餐「安樂茶飯」。
1 Trackback / Pingback