各位乘客唔使驚 龍運都係九巴啫

2020年5月29號，一班搭開九巴嘅乘客突然發覺平日搭開嘅九巴「金色」巴士無咗影，但就無啦啦多咗啲龍運「橙色」「機場巴士」埋站…

跟著陸續有讀者報料話「唔知點解今日啲龍運巴士亂咁行…」

其實呢~大家細心啲留意返，呢啲巴士雖然底色係「橙白」嘅龍運巴士色彩，但係掛返「KmB」標記㗎喎！

原來今次係龍運將大約20架雙層巴士借調去同集團嘅九巴，有消息指事緣近來龍運新巴士到埗快過安排原有巴士「退役」（其實都係過檔返九巴），加上新型冠狀病毒（武漢肺炎）打擊國際旅遊，出入機場乘客量暴跌，引致龍運車隊「運力過剩」，咁啱九巴又正需要返多啲巴士，索性借調一啲巴士過去九巴，於是就出現龍運巴士掛九巴標記行九巴路線嘅情況喇！

今次借調巴士嘅行動，當然難免令到一啲乘客一下子「嚇親」，以為巴士車長揸錯巴士開工，甚至有一刻驚自己會搭錯巴士而「窒步」――不過…有巴士你搭就搭啦！

但係…即係咁講…龍運啲巴士向來預期係畀乘客出入機場，巴士車廂同九巴當然有啲分別――尤其係多咗個行李架。

本台人員就今次龍運巴士行九巴路線訪問咗一啲乘客，佢哋了解過背景之後普遍都表示理解今次安排，但當然略有微言，主要係圍繞返「多咗個行李架…用唔著…但就即係少咗座位」，不過都係「有返多啲巴士可以搭都好嘅」、「點都好過搭地鐵」。

另外，本台人員喺其中一班龍運巴士行九巴路線嘅班次上，喺巴士車廂遇到佩戴住職員證嘅運輸署人員，手執筆記簿疑似視察情況作記錄，但相關人員對提問只報以微笑同「唔方便講」，未有回應係咩行動。