【加拿大】減低染病嘅風險 巴士乘客免畀錢

因應新型冠狀病毒（武漢肺炎）肆虐，醫學界有建議公眾互相保持距離，當公共巴士嘅車長每日返工都要面對大批乘客，究竟點樣可以保持距離呢？

加拿大卑詩省內嘅大溫哥華區域局表示：「簡單啦！叫所有乘客由後門上落巴士，大不了唔收車費啫！」

由2020年3月20號開始，乘搭大溫哥華區域局管轄範圍內多間巴士公司嘅公共巴士，除因肢體障礙而需協助上落者外，乘客上落巴士都要改經後門，而乘客不論繳付現金或使用乘車票，車費都會獲得豁免。

當局決定免收車費嘅原因，主要係同當地公共巴士車廂配置有關：好多巴士無法喺後門加裝錢箱同埋智能卡感應器。

除咗要求乘客改用後門上落巴士之外，巴士公司亦會限制乘客，搭巴士期間唔能夠坐喺近車長嘅座位，以保障巴士車長。

另一方面，當地公共巴士以外嘅公共交通工具會照常收取正常車費。