英國嘅第一巴士集團喺2019年11月2號向外公佈，為向一眾為國為民作出犧牲嘅軍事服務人員致敬，佢哋決定會喺2019年11月10號嘅「國殤星期日」（香港稱「和平紀念日」），向現役同埋退役嘅軍事服務人員提供免費公共巴士服務。
2019年11月10號「國殤星期日」當日，喺英國本土現役同埋退役嘅軍事服務人員，只要向第一巴士集團旗下公共巴士嘅巴士車長出具以下任何一種相關證明，就可以獲得免費乘搭公共巴士：
- 身穿軍事服務人員制服 或
- 佩戴軍事服務人員勳章 或
- 出示軍事服務人員證件
西英格蘭第一巴士董事總經理向傳媒表示，「國殤紀念日係銘記歷次戰爭中犧牲嘅軍民… 我哋提供呢個優惠就係想以最簡單嘅方式令到呢一班過去以至現在服務我哋國家嘅人能夠響佢哋生活嘅地區出席當日相關嘅活動。」
「公司入面由司機、工程人員，以至寫字樓員工，有唔少都曾經係軍事服務人員，佢哋亦有唔少家人、朋友係現役或者退役嘅軍事服務人員，每年去到呢個時間我哋都深明佢哋嘅辛酸。」
香港作為曾經嘅英國屬土，加上亦曾經捲入過兩次世界大戰，當然亦都曾經好重視「和平紀念日」呢一個紀念兩次世界大戰英勇犧牲軍人嘅日子。
時至今日，香港民間對於認真面對香港歷史仍然非常重視，故此香港亦都有唔少人係會喺10月尾都11月初呢段時間，自發佩戴虞美人花標記作為紀念曾經為保衛家國而犧牲嘅軍人――當中不乏巴士從業員。
講到「官式」嘅活動，英國皇家退伍軍人協會（香港分會）一如以往會喺10月尾到11月初舉行虞美人花賣旗籌款，以支持香港本地嘅退伍軍人。
至於有關2019年喺中環和平紀念碑舉行嘅「和平紀念日」儀式，可以留意以下流程，留意公眾人士只可以喺當日儀式舉行場地圍欄以外參與。
Lest we forget.
2 Trackbacks / Pingbacks