十三萬人齊集會 中環歸途排好隊

2019年10月14號晚，喺中環有關於美國國會就表決《香港人權及民主法案》（Hong Kong Human Rights and Democracy Act）嘅公眾集氣會，主辦單位話有13萬人出席（換算成毅進制則為25200人）。

呢度唔講個法案，講吓集會背後發生嘅事：

話說依家党铁咁不得民心兼與民為敵，要呢13萬人搭鐵路離場就真係癡人說夢。

結果中環天星碼頭上下層兩條人龍就延綿不絕，上層排到過埋怡和大廈，下層就打蛇餅咁先兜去9號碼頭再屈返轉去到2號碼頭… (=_=)”

有見及此，一眾巴士佬反正都改道，索性就為人為到底，直接揸啲過海巴士入中環天星碼頭接市民走啦！

當去到天星碼頭對開個迴旋處，一停低，醒目嘅香港人就已經大叫「去呢區嘅可以去搭呢架，去嗰區嘅可以去搭嗰架」，仲有班後生仔自發幫手打交通同帶人排隊添！

雖然人多擠逼，但喺市民齊心協力之下，想搭巴士嘅乘客雖然要屈就喺馬路中間排隊等上巴士，但期間大大細細嘅車輛仍然係可以順暢咁喺人龍之間駛過。當乘客要上巴士嘅時候，塞喺馬路上嘅其他司機唔單止無瘋狂響咹，有時仲會一齊大嗌「香港人加油」。

成晚數以萬計嘅乘客喺「無警時份」能夠安然有序咁搭小輪、搭巴士，反而一街之隔嘅地方，「狂暴隊」一出場就腥風血雨，究竟邊一啲組織喺香港「始暴製亂」，顯然易見。