退役巴士街頭違例泊車 警方到場證實使用虛假「試車牌」

2023年6月17號傍晚時分，互聯網網絡社交媒體流傳著一張相片，有相片中可以見到一架退役嘅九巴10.6米版本富豪超級奧林比安型雙層巴士係（退役前車隊編號：ASV77，退役前車輛登記：LR623），車身周圍拉起咗警察封鎖線。

香港警務處喺2236時發出消息，指相關巴士牽涉入刑事案件，事緣係2023年6月17號1750時，警方收到有人報案，指喺粉嶺百和路88號對開有人違例泊車並懷疑行使虛假嘅試車牌照（俗稱「T牌」）。

其後警方派員到場調查，懷疑呢一架退役巴士上面所掛有嘅「T牌」根本就未有登記記錄，警方因此拘捕咗一名41歲姓鍾嘅男子，現正被扣留調查，被捕男子涉嫌干犯以下3種罪行：

• 行使虛假文書
• 駕駛時沒有第三者保險
• 駕駛未有登記車輛

根據運輸署規定，「T牌」只供真正從事車輛製造、維修或經營者使用於駕駛持牌人管有嘅車輛作特定營運用途，但必須嚴格遵守有關嘅使用限制。