3號強風訊號生效 港島接連冧樹阻巴士

熱帶氣旋「納沙」進入南海北部，香港天文台喺2022年10月17號1130時發出3號強風訊號，香港境內部分地區陣風更加高達時速80~90公里。

近年香港唔少樹木都有潛在問題，出現唔能夠抵受風吹雨打嘅情況，今次熱帶氣旋「納沙」雖然未為香港帶嚟暴風，但強風仍然吹冧一啲樹木，部份更影響到公共巴士服務。

傍晚時分大約1940時，山頂道92號山頂警署對出，路旁有一棵大樹突然倒冧，擊中途經嘅新巴1架行緊15號路線嘅丹尼士E400型雙層巴士（車隊編號：3855，車輛登記：VA8706）。

當局接到報案後立即調派消防及救護人員趕去救援，警方消息指，意外共造成3男1女受傷，需要由救護車送去瑪麗醫院救治，據悉其中3人傷勢較重。

差唔多時間，中環德輔道中近畢打街亦有樹木倒冧，當時新巴1架行緊948號路線嘅12米版本丹尼士E500型雙層巴士（車隊編號：5830，車輛登記：WA3855）幾乎被扑中，幸好及時停低，避過一劫。

事發後，消防處派出港灣消防局大搶救車以及中區消防局油壓升降台車到場，現場交通中斷，初步消息指今次冧樹幸好無人受傷。

現場除咗馬路受阻，令到道路交通中斷之外，電車東西雙向服務亦都中斷。

而同一時間，較早前發生交通意外嘅#160電車，揸緊返去屈地街電車廠期間，亦因為中環呢一次嘅冧樹事件被逼喺長江中心對開滯留。

消防員亦好快升起升降台「鋸樹」，務求盡快恢復德輔道中交通。

為咗加快清理倒冧嘅樹木，香港電車亦都派出1架工程車協助消防員。

最終中環嘅冧樹喺大約2120時清理好，路面亦都隨即重開。