【渡輪】再有員工染疫 中環←→紅磡航線又停航

2022年2月21號朝早，富裕小輪曾經因為受新型冠狀病毒疫情影響，突然取消「中環←→紅磡」渡輪航線，曾惹嚟「執笠」疑雲。

【渡輪】中環←→紅磡突停航 只因需要消毒清潔

事隔未夠1星期，2022年2月27號朝早，富裕小輪再次突然取消「中環←→紅磡」渡輪航線，呢一次都係因為受新型冠狀病毒疫情影響：

由於中環——紅磡航線有一名員工，按照公司日常防疫程序要求，於今早上班前做快速新冠病毒檢測試時，檢測報告為陽性，為確保員工及顧客的健康及安全，按公司的防疫程序，已即時安排該名員工和相關密切接觸人員家居隔離，並重新調配船員盡快提供服務。該航線於今日（2月27日）08:50暫停營運，以便對船舶及碼頭進行徹底消毒及深層清潔工作。航班恢復時間將另行通知。

運輸署亦表示接獲富裕小輪有限公司通報，中環——紅磡航線已經喺上晝8點50分起暫時停航。

受影響市民可以改搭由九巴同埋新巴聯營嘅115號過海隧道巴士路線。

紅磡→中環：

上車：黃埔花園巴士總站
落車：干諾道中近皇后像廣場

中環→紅磡：

上車：德輔道中近皇后像廣場
落車：紅磡道近民泰街口（近港鐵黃埔站A出口）

到中午時份，富裕小輪再發出新聞稿，指對船舶以及碼頭做完消毒同清潔，並重新調配船員同埋更換船舶，中環——紅磡航線會喺下晝15點40分起由紅磡開出首班航班。