【土耳其】疑胎紋太淺釀禍 城際巴士44傷

當地時間2020年3月14號清晨，土耳其中部有一架城際巴士喺高速公路撞上一架貨車，再衝出公路外草地，造成44人受傷。

涉事巴士係由伊斯坦堡開去南部城市阿達納，喺高速公路從後撞上一架同方向行緊嘅貨車尾部，令巴士上嘅司機、服務員、42名乘客受傷，其中1人危殆。

有巴士乘客表示，巴士喺伊斯坦堡嘅巴士總站開車時，有交通警察檢查巴士車胎之後，認為車胎已經過度損耗、胎紋太淺，制止巴士載客。

但係巴士公司利用接駁小巴將乘客由巴士總站載去一個橋底位置，要乘客上返嗰架交通警察認為有問題嘅巴士繼續行程，雪上加霜嘅係同時有多名乘客指巴士司機「恰眼瞓」――司機反應遲鈍加上輪胎問題，最終引致車禍。

當地警方表示，初步發現巴士裝上嘅係冬天用車胎，不過胎紋已經磨剩大約2毫米，比土耳其法定要求「唔少過4毫米」為淺，警方已經就車胎問題票控巴士司機；至於貨車司機未有受傷，但警方仍然先扣留佢協助調查。