當勝利二型 G36 要由拖車拖去恒生大學嘅時候…..

勝利二型 G36 於恒生大學嘅展覽完滿結束。唔少參觀人士都睇到嘩嘩聲。的確承如前文所講，勝利二型就係香港巴士經典之最。若要講呢款車，真係有大把故仔可以講，而集中於呢一部 G36，與及另一部所知復修工程進行中嘅勝利二型，以至其他私人保留嘅退役巴士，單係保存以至要拖車，已經有唔少嘢可以講。

有人話，响香港保存退役巴士，可以話慘過做賊，唔止得個擺字，撇除有人玩爛玩具嘅問題，真係想行都無得行。

撇除車主同復修團隊嘅安全考量，G36 嘅機件尚算正常，其實係可以由車場揸過去小瀝源。就算要SPIN 「玩爛玩具」嘅問題，歸根究底都係政策嘅問題。但「無比較無傷害」之下，一般市民，根本唔會明白，要 Call 拖車到底係有幾咁諷刺。

巴士迷圈子通常會拎依家响蘇格蘭嘅中巴 LV36 做比較，其實都清楚展示個諷刺係幾咁諷刺，但懶係雞蛋裡挑骨頭咁講，LV36 出牌日期比 G36 遲咗足足一年。

翻查資料，依家响恒生大學展出嘅 G36 係响1979年9月25日首次登記。响英國除咗「同門表兄弟」嘅LV36之外，我認為仲有一個例子可以講吓。

Ailsa Volvo B55 雖然並非同類，即使用返巴士迷術語，G36係「雞」而 Ailsa 係「鵝」，但相片呢部來自蘇格蘭 Tayside 嘅「鵝」，係响1979年2月出牌。比 G36 早咗七個月。

同樣都係47年車齡，一部唔止行得走得，仲可以載客遊車河；加埋 LV36 呢部「同門表兄弟」做更清晰、深入嘅比較，應該更加睇到 G36 以至其他退役巴士要「出街」就要搵拖車嘅諷刺程度有幾咁高。