城巴近年積極推動利用經典巴士加強聯繫社區，單單喺過去嘅2023/24年度就主辦同埋參與多場經典巴士展覽，據估計吸引咗超過10萬人次參觀。而相信一眾巴士迷都唔會忘記2023年喺「中環夏誌2023」入面曾經展出過嘅一啲經典巴士：
嚟到2024年，城巴經典巴士車隊再添一員——配上經典城巴「大食鬼」圖案嘅11米版本利蘭奧林比安冷氣雙層巴士（車隊編號：178、車輛登記：EV6091）——為城巴45周年慶祝活動增添色彩。
為咗慶祝城巴服務香港市民45周年，城巴喺2024年完成復修曾經喺1990年代最具代表性嘅11米版本利蘭奧林比安冷氣雙層巴士，並且安排喺2024年7月21號去到城巴公共巴士業務發跡地——沙田第一城——為社區展覽活動揭開序幕。
城巴表示目前擁有8架經典巴士，組成咗跨越唔同時期嘅經典車隊，工程團隊已經順利將經典巴士保養到能夠載客行駛嘅標準，但「願望成真」之路仍然有障礙：
由於呢批巴士當年退役嗰陣已經由其他新巴士取代
並且註銷車輛登記
因此現行法例下並唔容許重新登記呢啲巴士
出席公眾活動嗰陣只能以類似「1：1模型」擺設方式公開展出。
城巴董事總經理李卓豪先生表示，希望能夠同政府合作尋找解決方案，畀市民以至訪港旅客能乘搭曾經服務香港多年嘅經典巴士，回味舊日香港情懷。
唔少中国大陆以及海外城市，經典巴士已經成為吸引旅客嘅獨特旅遊特色，旅客可以乘坐經典巴士，感受當地獨特歷史風情。城巴希望將經典巴士車隊籌組成『移動旅遊景點』，向旅客推廣香港獨特嘅雙層巴士文化，一方面帶動香港旅遊業蓬勃發展，另一方面令旅客了解香港幾十年嚟交通以及社會發展。就香港本地公共交通愛好者而言，新一代能夠親身體驗經典巴士，了解巴士喺不同年代嘅配套以及定位，促進人文交流同埋加深認識公共交通發展。
城巴為沙田第一城居民開創首條非專利巴士路線，並且喺1989年升級做全香港首創嘅「早餐巴士」，乘客可以安坐車廂享受巴士公司特別安排嘅早餐以及報紙——減省咗原本要喺朝早趕住返工嗰陣另外撲去買早餐同埋報紙嘅時間——以優質以及創新服務贏得社會各界讚賞。
2024年成功復修呢一款身披城巴「大食鬼」圖案嘅11米版本利蘭奧林比安冷氣雙層巴士，正正就係1990年代城巴服務沙田第一城居民嘅重要成員，仲見證城巴躋身專營巴士營辦商行列甚至開辦過境巴士服務，足跡遍佈城巴各業務範疇。
呢一款身披城巴「大食鬼」圖案嘅11米版本利蘭奧林比安冷氣雙層巴士亦可以話係城巴一代「車王」，其中一樣就係當年叫做創新嘅冷氣系統設計，上下兩層車廂各自設有獨立冷氣機組，送風能力強勁，無論乘客坐喺車廂任何位置，都能夠置身喺清涼舒適嘅車廂環境；另一方面，當時香港專營巴士絕大部份車輛仲係「3+2」座位編排嘅「非空調巴士」，城巴引入「2+2」座位編排，配搭相啱啱提過嘅冷氣系統，令乘客全程車都覺得好舒服——毫無疑問呢一款11米版本利蘭奧林比安冷氣雙層巴士喺當年可以話係豪華巴士嘅象徵，亦標誌住城巴引領香港巴士服務技術潮流發展嘅開端。
隨著呢一款身披城巴「大食鬼」圖案嘅11米版本利蘭奧林比安冷氣雙層巴士完成復修，城巴希望政府可以修訂相關法例嘅限制、拆牆鬆綁，能夠畀公眾再次陪伴家人、朋友乘坐呢啲曾經陪伴佢哋成長嘅經典巴士，一齊上街重遊香江，喺香港街道上細說當年情。
1 Trackback / Pingback