講到平治巴士，相信唔少人即時反應就會諗起「屯公車王」O305 雙層巴士，但平治嘅旅遊巴士一直响本港市場佔一席位。其 OC500RF 豪華巴士底盤自推出以來都受到唔少旅遊巴公司垂青。最近平治商用車香港代理仁孚行再度引入配備最新 Euro 6E 環保標準引擎嘅 OC500RF 旅遊巴士底盤。今日假座其元朗的維修中心舉行展覽，招待業界及傳媒參觀。
會場內展出兩部已裝嵌車身嘅 OC500RF 旅遊巴士，分別為一部廣通客車車身，及一部 Marcopolo Audace 800 車身；與及一條出廠狀態的 OC500RF 底盤。
已裝嵌好車身嘅巴士，對於業界而言可謂作個參考，事關平治 OC500RF 底盤能夠與唔同嘅車身廠商配合，建造出符合客戶需要嘅巴士。其中 Marcopolo 的一款，據代理方面透露，跨境客運龍頭之一嘅中旅集團已訂購12部。
對於業界的另一方面而言，過去甚少機會目睹 OC500RF 底盤的「真身」，今次展覽展出的「出廠狀態」底盤，好讓業界一睹廬山真面目。對機械佈局有初步了解，以使日後保養功夫略有概念。
所謂「出廠狀態」就是於平治廠房完成生產準備交付到車身廠的狀態。相對於整車，除咗未有車身之餘，前後車軸嘅距離相當之短。一般旅遊巴嘅軸距大約5.5 至 6.2m，而呢種行內俗稱「縮水陣」嘅軸距一般大約 3.2 至 4.0m。呢種設計主要為咗方便運輸，當底盤抵達車身廠之後就會將之「腰斬」，然後按照訂單需要延長軸距並定位，根據例如平治車廠嘅廠方技術要求焊接駁上鋼材形成行李倉部份的結構，再之後建造車身其餘部份。
展出嘅底盤為「細偈」規格，配備 OM936 引擎，排氣量 7.7L，動力輸出達 356PS / 1400Nm；客戶另可選擇「大偈」 OM470 引擎，排氣量10.7L，輸出 390PS / 1900Nm。
不論「大」定「細」，波箱均為 ZF Ecolife 2 自動波箱，當然有 Retarder。迫力系統除咗 EBS 4 電子煞車之外，ESP 電子車身穩定系統與及平治稱為 ABA 6 緊急煞車系統，連埋ePBC 電子手制，再仲有車道偏移警示 (Lane Departure Warning System) ，均列為標準規格。
懸掛系統一律氣墊式，前懸掛更是採用獨立結構，公路巡航穩定性同「好軚」表現都無容置異。
一般公眾對平治嘅品牌印象，從來都係吸引力。縱使要乘搭平治旅遊巴嘅機會都唔難 (嚟緊應該越嚟越容易)，但要真正近距離接觸，今次展覽確實係難得嘅機會，更何況連業界都鮮有見到嘅底盤呢?! 嚟緊星期六，展覽將向公眾開放。業界人士則可預約明天 (5月10日) 優先參觀。
平治 OC500 豪華巴士展覽詳情：
地點：元朗康業街1號 平治商用車特許維修中心
公眾參觀時間：5月11日 (星期六) 上午11:00 至 下午 17:00
備註：所有規格資料僅供參考，一切以廠方及代理公佈為準。
Be the first to comment