剛呢個週末嘅英國嘅巴士盛事，除咗响倫敦嘅 RM70 – AEC Routemaster 70週年集會之外，仲有响距離倫敦西南約50km 嘅柯頓鎮 (Alton) 舉行 Alton Bus Rally，更可謂對於香港人更為震撼，因為兩部係從香港越洋抵英並成功領取當地車牌嘅退役巴士，分別係前城巴 Leyland Olympian (車隊編號152) 及前九巴嘅 MCW Metrobus 11m (車隊編號 S3M249) ，响是次集會展出嘅巴士。
城巴嘅 Olympian 另文分享，本篇先分享返部前九巴 MCW Metrobus。
呢部前九巴 MCW Metrobus 11m 雙層巴士，為車主於去年年底從香港運抵英國，並响當地完成辦理領牌，可於當地合法行駛，甚至載客。
翻查資料，呢部香港原車牌 EL7659 嘅 MCW Metrobus 係响1990年5月出廠，一直主要服務九龍東、將軍澳區域足十七年嘅光景，至2007年5月除牌退役，之後由徐家豪先生斥資購入保留。唯香港嘅法例及政策所限，一直只停放在私人場地。及後進行各項復修工序，再於去年運往英國。
點解响英國可以出到牌？
英國運輸部 (Department of Transport) 訂立有古董車檢驗、領牌及稅務豁免指引 (Historic (classic) vehicles: MOT exemption criteria) ，闡明出廠年份已逾公告的年期 (目前為40年) 嘅巴士，均可以按照有關嘅程序驗車及以 “vehicle of historical interest” 條件登記領牌，但可能需要繳付牌照費用等稅項。牌照容許巴士載客但不能向乘客收取車費。至於例如早前報導過嘅倫敦 T15 古董巴士線，則屬於另一種領牌條件的。
要响英國駕駛「九巴」(或城巴、中巴) 嘅條件同一般嘅駕駛執照情況相同，司機必須持有 Cat D 牌照及通過咗 Driver Certificate of Professional Competence 考核。
相信香港市民或已移居英倫嘅港人該更加清楚點解呢架退役九巴 MCＷ Ｍetrobus 以至其他來自香港嘅退役巴士可以响英國四處出沒甚至接載乘客遊車河。
鳴謝Steven、Brian Wong 及富蝶邨業主關愛協會主席提供相片及相關資料。
Be the first to comment