英國巴士生產商 Alexander Dennis 旗下城市巴士 ENVIRO 系列一向廣為世界各地巴士營運商所採用，自2002 年登場以來已經歷過一次大改款及兩次小改款（🤡以及多個不同小小小改版本）。正藉英國伯明瀚舉行 Euro Bus Expo 2022， Alexander Dennis 就借機發佈新一代 ENVIRO 城市巴士車系。
全新 ENVIRO 城市巴士車系，使用 Alexander Dennis 於月前透露全新設計嘅車咀設計，除此之外亦採用大而深嘅擋風玻璃，為車長提供更清晰嘅駕駛視角。車頭泵把前緣嘅黑色線條一直向車側 A 柱伸延，令車頭擋風玻璃喺線條上更融合於車側設計。雙層版本上層 A 柱後車窗亦向車頭下傾，除咗提供更佳嘅採光同視野外，亦同下層黑色線條互相呼應。而先進嘅 Smart Vision 電子倒後鏡系統，亦都會喺車系上出現。
車廠發佈嘅宣傳照中，除咗有英國各地廣為採用嘅 ENVIRO 400EV 型號嘅全新造形外，旁邊亦都有一部名為「ENVIRO 100EV」嘅單層巴士。ENVIRO 100EV 定位為中小型單層巴士，使用小輪徑車輪底盤。
Alexander Dennis 以及前身 Dennis 嘅城市巴士車系之中以「100」為名嘅型號，向前數已經係「ALX100」，一款配上其他牌子底盤嘅小型巴士車身。ENVIRO 100EV 嘅出現會唔會係 Alexander Dennis 打算再次重新進軍中小型巴士市場呢？就真係要睇下廠方喺 Euro Bus Expor 期間，會唔會再發佈更多資訊喇﹗
1 Trackback / Pingback