風暴遠離 巴士服務準備恢復 但員工接送巴士因為其他車撞咗…

熱帶風暴「尼格」（Nalgae / 2222 / WP262022）風力陸續減弱，並且喺珠海附近登陸，香港天文台喺2022年11月3號0520時將香港嘅熱帶氣旋警告信號，由「8號烈風或暴風信號」轉做「3號強風信號」，並且喺0620時取消所有熱帶氣旋警告信號。

因應天氣情況轉好，香港市面活動將會陸續恢復正常，公共交通機構亦早已要求員工準時返工。其中各間公共巴士公司亦都已經喺2022年11月3號大約04時開始派出員工接送巴士，接載早更嘅巴士車長返回所屬巴士車廠報到。

但係喺橫風橫雨之下準備返工確實係有一定嘅風險，其中城巴嘅員工接送巴士喺九龍就發生咗交通意外。

消息指喺2022年11月3號凌晨4點幾嘅時候，負責行駛員工巴士路線嘅1架城巴青年JNP6105GR型單層巴士（車隊編號：1821，車輛登記：RR2264）喺去到油麻地加士居道天橋、舊油麻地公眾停車場管道嘅時候，遇上涉及1架私家車嘅車禍，結果員工接送巴士就要停喺度。

根據運輸署嘅消息，因應呢宗交通意外，加士居道天橋來回方向近舊油麻地停車場嘅行車線需要封閉。