投資手機程式2周年慶　再伙香港電車推出「叮叮樂」免費乘車日

回顧1年前，為咗慶祝「漲樂全球通」智能電話流動應用程式正式推出一周年，華泰國際喺2021年中秋節正日——9月21日（星期二）——舉辦「叮叮樂」免費搭電車日活動。

為熱烈慶祝華泰國際金融控股有限公司（簡稱「華泰國際」）旗下「漲樂全球通」上線2週年，由華泰國際主辦、香港中國企業協會支持嘅第二屆「叮叮樂」全港市民免費搭電車日啟動禮喺2022年9月10號朝早10點假香港電車屈地街電車廠內舉行——今次係繼2021年成功舉辦首屆「叮叮樂」活動後，華泰國際再度邀請全港市民喺中秋節當日無限次免費乘搭電車，共享中秋喜悅。

今次活動由香港中聯辦經濟部部長孫湘一、香港特區政府財經事務及庫務局局長許正宇、香港中國企業協會副會長兼總裁張夏令、華泰金融控股有限公司首席執行官王磊、中國工商銀行（亞洲）有限公司副總裁徐磊、中信銀行（國際）有限公司行政總裁畢明強、香港特區立法會議員陸瀚民、香港經濟民生聯盟副主席張華峰、香港金融發展局長總監及政策研究主管董一岳、香港貿易發展局傳訊及推廣事務總監蘇詠雪、香港江蘇企業協會秘書長姚銘、香港網上經紀協會主席伍子權、華泰金控網絡金融與零售業務部主管朱亞莉共同主禮。

主辦方代表華泰金控首席執行官王磊喺致辭中表示，作為植根香港嘅中資企業，華泰國際一方面竭誠為特區政府施政建言獻策，積極參與構建香港未來發展藍圖，一方面積極履行社會責任，關懷廣大市民，切實回饋社會。

王磊表示，佢將引領集團繼續發揮中資企業獨特優勢，運用金融科技創新業務模式，持續賦能機構業務與及財富管理業務，為香港資本市場不斷注入新活力。

財經事務及庫務局局長許正宇發言時就話，好高興見到越嚟越多在港中資金融企業，不單止喺業務上開拓創新，同時又積極踐行企業社會責任，回饋香港社會。多年嚟，中資企業憑藉對中國市場深入了解，充分挖掘香港作為國際金融中心嘅平台優勢，幫助中國企業喺國際資本市場講好故事，高效融資，同時又積極聯動同引領國際投資者，參與國家「十四五」規劃指引下嘅經濟發展以及社會建設，進一步提升了香港競爭力。

啟動禮之後，一眾嘉賓搭#128電車，連同2架披上「華泰國際漲樂全球通」全車身廣告嘅#6、#112電車一齊參與巡遊，並且向路人揮手致意。

巡遊由屈地街電車廠出發，沿電車路去到銅鑼灣電車總站再返轉頭，宣傳當日全港市民都可以免費乘搭香港電車全線。

一如以往嘅免費乘車日，全線電車都會有布袋笠著錢箱同埋八達通機。但對比以往嘅免費乘車日，今次喺啟動禮安排咗2款相關嘅電車模型，送畀出席嘅嘉賓留念。

至於講返「免費乘車日」本身，所有喺2022年9月10號乘搭香港電車嘅乘客，不論距離、路線，總之喺當日「收車」前乘搭香港電車，落車時都唔需要繳付車資。