香港男歌手、演員、舞蹈員盧瀚霆（Anson LO Hon-ting，外號「教主」），喺2018年5月參加由ViuTV主辦嘅《Good Night Show 全民造星》，成為5位「Eye catching idol」之一，晉身香港男子組合MIRROR嘅成員。佢喺2019年12月《全民造星II》中獲得「專業大賽冠軍」、2020年2月29號推出首支單曲《一所懸命》以個人身份正式出道。
隨著「人氣」飊升，盧瀚霆嘅支持者（外號「神徒」）喺2021年就曾經包起九巴旗下1架雙層巴士嘅全車身廣告，利用呢架「教主巴士」祝賀「教主」生日快樂。
之前講過話有「神徒」自發搵九巴整咗1架「教主巴士」，早幾日已經喺36M號路線「首航」，之後仲行過6C號路線，當然正常就應該會安排去行隧巴112號路線嘅。
至於大大個「盧瀚霆國際後援會」
當然搞活動就更有規模啦！
隨著尖沙咀天星碼頭巴士總站側邊嘅廣告牌由普通帆布燈箱，變成咗LED螢幕，「盧瀚霆國際後援會」就安排咗喺2022年7月2號到7號，每日朝8晚11咁播出「Anson Lo & Sontos Giving Day 3D片段」，當中仲包括有「教主」第9首Solo歌《King Kong》嘅MV添！
「盧瀚霆國際後援會」又點會漏咗自家嘅「教主巴士」吖！
2022年「盧瀚霆國際後援會」出品嘅「教主巴士」搵嚟九巴嘅12米版本富豪B9TL型雙層巴士，車隊編號AVBWU76，車輛登記PV4366，2022年6月30號「首航」，會掛落7號路線（樂富←→尖沙咀碼頭）。
7月7號生日吖嘛！
因為都有其他MIRROR成員嘅全車身巴士廣告係擺咗上行尖沙咀碼頭嘅路線，所以夾得啱時間就仲可以「同其他MIRROR成員合照」添！
作為「神徒」
帶埋屋企「阿仔」同「教主巴士」合照都好合理吖！
順帶一提，因應車務調動或者班次調節，九巴7號路線用嘅巴士，喺樂富總站嗰邊有時會調去行7B、11D號路線，所以如果係見到「教主巴士」喺7號路線去咗樂富，你走去企定喺尖沙咀碼頭未必一定夾得中之後「教主巴士」喺樂富回頭返尖沙咀㗎！
臨尾講返，為咗宣傳2022年7月7號嘅「免費乘搭日」，「神徒」喺「Anson Lo & Sontos Giving Day 3D片段」將「教主」包裝成粉紅色禮物送畀大眾：
畫有「教主」唔同Solo歌曲造型嘅「Little Anson」乘搭天星小輪同「神徒」見面，仲有「教主慈善生日月」宣傳照嘅主題巴士駛入「Anson Lo & Sontos Giving Day」Pop Up Store，令大家一同響應「慈善生日月」，同時集結「Anson Lo & Sontos Giving Day」一系列的慈善活動。整個片段配合3D效果，能夠為「神徒」以及途人帶嚟視覺衝擊力，實現零距離互動。
多謝「神徒」！
1 Trackback / Pingback