九巴同埋龍運為吸引乘客搭多啲巴士，喺2020年10月推出「九巴龍運FUN分賞」活動，乘客利用已經登記嘅八達通卡乘搭九巴同埋龍運旗下嘅專營巴士，可以按巴士車資賺取積分，從而換取獎賞。
一直以嚟，巴士台都收到有市民反映，其實九巴成個積分計劃改嚟改去都係「陰啲陰啲呃緊啲會員」，當然做生意就唔係開善堂，「童叟無欺」係𠱁小朋友瞓覺嘅床邊故事嚟嘅啫。
以前收過啲意見就係話「唔見咗啲分」呀、「專登設定到月票僅僅唔夠分換嘢」呀、「要補錢先至有得換嘢」呀（點解假設人人都用到電子支付呢？）之類，近來收到嘅意見就仲得意：
九巴揼錢搵人宣傳一堆根本玩唔到嘅「小遊戲」
翻查資料，九巴公關早前真係請咗啲插畫師之類喺網絡社交媒體專頁宣傳過「小遊戲」，聲稱畀乘客等車、搭車期間可以消磨時間同埋賺返啲積分。
不過，是咁的，由推出以嚟，有唔少市民都反映，九巴呢啲「小遊戲」喺設定上有啲位唔符合「人類正常活動」，即係「一個正常人係過唔到關」。
又的確，根據網絡工程師分析過，九巴呢啲「小遊戲」喺設定上嘅「時滯」、「系統反應」等確實大幅減低人類贏面——尤其曾經喺「包剪揼」呢個「小遊戲」入面發現系統竟然會多次「彈弓手」——即係咁講，本身「包剪揼」呢個「小遊戲」係伺服器根本「贏梗」，因為玩家入咗個選擇之後，伺服器就可以按照玩家嘅輸入而畀反應，只係包裝得靚唔靚咁解。
當2022年4月20號有市民反映收緊咗派分標準之後…
另一樣比較多市民反映嘅係，九巴呢啲「小遊戲」好「手緊」，市民普遍反映，大家貪得意玩吓都唔係預咗「發達」，而當九巴都出得一句「[每天於小遊戲合共可領取分數上限為35分]」，何苦要將啲「小遊戲」派分派得咁唔「疏爽」嚟令人覺得搵乘客笨？
尤其根據網絡工程師同埋人類學者分析過，呢啲「小遊戲」嘅設定，本身要靠人體反應去「玩贏你個伺服器」都唔係容易，部分設定嘅得分標準更加係對於一般人嚟講「整返一條全自動程式先至有啲機會」…
又，問返唔少反映意見嘅市民都話，其實九巴咁驚「益咗啲乘客咁」，不如設定一個低啲嘅「每日可以拎到分數上限」，好過設定到每個遊戲都令大家覺得無癮囉！
然後，九巴喺1日後又再收緊派分標準：
九巴再補一句「[每天於小遊戲合共可領取分數上限為27分]」，算唔算切合返市民預期呢？
係呢，不如列返邊啲插畫師有份協助宣傳呢啲搵笨「小遊戲」？
1 Trackback / Pingback